Prishtinë. Komisioni Kosovarë i Konkurrencës (KKK) ka ndëshkuar me 200 mijë euro dy operatorët e licencuar për shitjen e arkave fiskale, përderisa ka rekomanduar Ministrinë e Ekonomisë dhe Financave të licencoj edhe operatorë të tjerë.

Kryetari i këtij Komisioni, Osman Ejupi, ka njoftuar se masat e ndëshkimit administrativ janë shqiptuar ndaj kompanisë “Gekos”, e cila është dënuar me 100 mijë euro për shitjen e arkave fiskale dhe krijimin e monopolit, pozitës dominuese ne treg, si dhe për abuzimin me pozitën dominuese në gjithë tregun e Republikës së Kosovës.

Edhe kompania “Dukagjini” është dënuar me 100 mijë euro për praktikën e bashkërenduar, që i mundësoi SH.P.K. “GEKOS” të krijojë monopol në treg dhe të abuzojë me pozitën dominuese në tregun e Republikës së Kosovës.

Këto janë gjobat e para që ka shqiptuar KKK-ja, pas hetimeve tre mujore që janë zhvilluar ndaj këtyre dy kompanive.

Komisioni Kosovar i Konkurrencës poashtu ka rekomanduar Ministrinë e Ekonomisë dhe Financave për liberalizimin e tregut me operatorë të tjerë ekonomikë, si dhe Komisionin për Licencim të analizojë tëre procesin e fiskalizimit në Kosovë, kur dihet se procesi po ngec dhe se ka koston më të lartë në rajon.

Shumë biznese kosovare vazhdojnë ta refuzojnë procesin e fiskalizimit për shkak të kostos së lartë të arkave fiskale. Nga fillimi i këtij procesi, më 1 prill 2010, e deri më tani vetëm rreth 2000 biznese janë fiskalizuar, krahas rreth 45 mijë bizneseve aktive që operojnë në territorin e Kosovës.