Prishtinë. Fillimi i ndërtimit të rrugëve të shumta dhe mungesa e rrugëve alternative në vend i ka qitur në situatë të palakmueshme prodhuesit kosovarë. Përfaqësuesit e komunitetit të biznesit alarmojnë se për shkak të një situate të tillë, prodhuesit vendorë ndodhen në një situatë të vështirë, të cilët po përballen me rritje të kostos së transportit.

“Më lehtë vjen një kamion nga Serbia, Novi Pazari, apo Maqedonia, sesa që prodhuesit kosovarë po arrijnë t’i dërgojnë produktet e tyre nga Prishtina në Pejë”, shprehet Safet Gërxhaliu, kryetar i Odës Ekonomike të Kosovës.

Edhe Bashkim Osmani, pronar i fabrikës për prodhimin e lëngjeve “Laberion”, e konfirmon një gjë të tillë.

“Më herët mallrat në Prizren i kemi dërguar për dy orë, tani na nevojiten së paku 4 orë. Në vend se të dërgojmë dy herë mallra brenda ditës, tani mezi po arrijmë një herë të dërgojmë mall në qytete të ndryshme të vendit”, shprehet Osmani.

Sipas tij, për shkak të kaosit në komunikacion edhe shpenzimet e transportit janë ngritur, ndërsa drejtuesit e kamionëve nuk mund të jenë më efikas për shkak të komunikacionit të ngarkuar.

“Transporti deri në Prizren më herët na ka kushtuar 50 euro, ndërsa për shkak të vonesave të mëdha kjo kosto tash është ngritur në 100 euro”, shprehet Osmani.

Kryetari i OEK-ut përkrah iniciativat e nivelit qendror dhe atij lokal për përmirësimin e infrastrukturës rrugore në vend, mirëpo, sipas tij, këto institucione duhet të jenë më azhure në punime, pasi që, siç thotë ai, komuniteti i biznesit po ballafaqohet me vonesa të shumta dhe ngritje të kostos së transportit. Kjo situatë, sipas tij, e rëndon edhe më shumë gjendjen e prodhuesve vendorë, të cilët ndodhen në një situatë të palakmueshme për shkak importit të madh të mallrave nga vendet e rajonit.

Ai thotë se që punimet nëpër rrugët e Kosovës të përfundojnë brenda afatit të paraparë, duhet të ekzistojë një monitorim për implementimin e projekteve.

“Duhet të ekzistojë një monitorim i mirëfilltë në implementimin e projekteve, në mënyrë që të mos ballafaqohemi me një situatë të tillë”, shprehet Gërxhaliu.

Nga ana tjetër, zëdhënësi i Ministrisë së Transportit, Xhevdet Pozhari, thotë për “Zërin” se në përgjithësi projektet rrugore përfundojnë brenda afatit të paraparë. Duke folur për vonesat në përfundimin e rrugës Fushë-Kosovë- Sllatinë, Pozhari ka sqaruar se këto vonesa kanë ndodhur për shkak të dimrit të gjatë gjatë vitit të kaluar, ku ekspertët kanë rekomanduar që të mos punohet gjatë kësaj stine. Ai ka bërë të ditur se shtresa e tretë e asfaltit në këtë rrugë do të shtrohet së shpejti me gurë vullkani.

Përpos vonesave gjatë muajve të dimrit, Pozhari thotë se në këtë rrugë kanë pasur probleme edhe me shpronësim, të cilat i kanë ngadalësuar punimet. Edhe në raportin e këtij viti të Bankës Botërore për Kosovën, thuhet se azhurnimi i infrastrukturës së transportit është i nevojshëm për të zvogëluar kohën dhe koston e transportit.

Sipas këtij raporti, infrastruktura e transportit është lënë shumë anash gjatë viteve 1990, dhe konflikti që ka arritur kulmin me bombardimin e NATO-s në vitin 1999 ka shkatërruar ose bërë të papërdorshme komponentë të rëndësishme të infrastrukturës së transportit. Pas luftës, janë bërë rindërtime të mëdha në rrugët kryesore dhe rrjetet e rrugëve, urave dhe tuneleve, kryesisht të financuara nga komuniteti donator. Megjithatë, ndarja e resurseve për veprimet e rindërtimit pas luftës që janë fokusuar me të drejtë në ndërtimin e infrastrukturës rrugore dhe të rrugët kryesore, bashkë me përkrahjen e kufizuar nga burimet vendore, ka pasur si rezultat mirëmbajtje joadekuate.

Rezultati i kësaj është një ngarkesë e konsiderueshme e mirëmbajtjes në rrjetin e rrugëve, veçanërisht në rrjetet sekondare dhe lokale të rrugëve.