Në momentin kur Ministria e Energjisë dhe e Minierave përpiloi listën e ngushtë dhe bëri publike se në garën për ndërtimin e Hidrocentralit të Zhurit janë KI – Kelag International GmbH (Austri), Palet Inşaat (Turqi) & Union D Energy System Development Corporation (Angli) dhe - Limak Group (Turqi), nga Shqipëria dolën disa që kontestojnë këtë projekt. Madje, edhe ministri i Energjisë Dritan Shehu, sipas medieve, ka thënë se ende nuk ka marrëveshje përfundimtare për këtë projekt dhe se një grup i ekspertëve vlerësoi të gjitha rrethanat.

E përditshmja tiranase “Shekulli” shkoi më larg në hulumtimin e këtij problemi. Sipas saj, HEC-i i Zhurit në Kosovë do të marrë ujërat e lumenjve të Borjes, Orgjostit dhe Çajës, duke rrënuar fshatrat, bizneset dhe mjedisin në zonën e Kukësit. Muaj më parë kur u miratua vendimi i ngritjes së pesë HEC-eve të reja, kryeministri i Shqipërisë Sali Berisha, e ka përmendur si problem ndërtimin e hidrocentralit kosovar, duke theksuar se do të merret parasysh edhe interesi kombëtar, por edhe se do të shihet se cili është projekti më parësor, ai i pesë hidrocentraleve të vogla në Kukës, apo ai në Zhur.

HEC-i i Zhurit do të ketë të mira për Kosovën, por të këqija për Shqipërinë. Në një analizë rreth projekt-idesë për ndërtimin e hidrocentralit të Zhurit në Kosovë, të kryer 2 vite më parë nga inxhinierët Islam Zhupa dhe Nexhat Maliqi, vepra hidrike do të jetë një nismë shumë e vlefshme për Kosovën. Por ajo duhet bërë, duke mos shkaktuar probleme në Shqipëri, nga devijimi i ujërave të lumenjve. Sipas specialistëve të fushës së energjetikës, ideja e ndërtimit të sistemit hidroenergjetik të Zhurit daton para vitit 1969. Asokohe Bordi Energjetik i Serbisë vendosi rritjen e fuqisë totale te vendosur te hidrocentraleve nga 136 Mw në 293 Mw.

Në vitin 1970 duke vlerësuar nevojën për vaditje u përjashtua përdorimi i ujit të lumit të Lumbardhit të Prizrenit. Në studim është rekomanduar vetëm vlerësimi i ndikimit të ndërtimit të sistemit hidroenergjetik të Zhurit në atë të Fierzës. Konstatohet, që duke qenë përbërës të pellgut ujëmbledhës së hidrocentralit të Fierzës, edhe pas devijimit të rrjedhës së lumenjve që do jenë pjesë e skemës së sistemit hidroenergjetik të Zhurit, ujërat e tyre do të derdhen në Drinin e Bardhë pra në pellgun ujëmbledhës të hidrocentralit të Fierzës.

Mirëpo, sipas kësaj gazete, midis Shqipërisë komuniste dhe ish- Jugosllavisë së Titos, në vitin 1976 është nënshkruar marrëveshja teknike lidhur me ndërtimin e HEC-it të Fierzës i cili pas ndërtimit në vitin 1980 përmbyti qindra hektarë me tokë të fshatrave në territorin e Kosovës. Sipas Galip Hodës nga Prizreni, njërit prej anëtarëve të asaj kohe të komisionit teknik të palës jugosllave, në bazë të marrëveshjes, Shqipëria nuk ka paguar asnjë dëmshpërblim për tokat e përmbytura në Kosovë.

Këto dëmshpërblime janë përballuar nga shteti jugosllav i asaj kohe, me kusht ndërtimin e HEC-it të Zhurit ku Shqipëria do të pranonte pakësimin e ujërave në lumin Luma që buron nga malet e Sharrit pas ndërtimit të HEC-it të Zhurit.

Gjatë një debati rreth kësaj problematike, ministrja kosovare Justina Pula- Shiroka edhe një herë i është kthyer këtij problemi.

"Pas studimit që është duke bërë ky grup, çështja e marrëveshjes kalon në nivel të diskutimit në mes të dy kryeministrave. Shqipëria ka dhënë disa koncesione pavarësisht asaj se ka ekzistuar një marrëveshje me ish-Jugosllavinë, ndërkohë që ka qenë në dijeni për projektin Zhur", ka thënë ministrja Shiroka-Pula.

Reagimi i ministres kosovare vinte pas deklarimeve të kryeministrit Berisha në mbledhjen e KRRTRSH-së në 6 korrik 2010, se: "Ka përrenj që vijnë nga Kosova në territorin e Shqipërisë.