Prishtinë. Xhinset “Made in Kosova” do të prodhohen në “Kosovatex”. Ndërmarrja e dikurshme shoqërore, e privatizuar para katër vjetësh, më nuk do të prodhojë tjerr, por në konkurrencë futet me produkte finale - konfeksion prej xhinsi.

Është e pajisur me teknologji bashkëkohore, me një mundësi kapaciteti të mjaftueshëm për tregun e brendshëm dhe për eksport dhe cilësi e dizajn sipas shijes së konsumatorit.

Nexhmedin Ejupi, drejtor në fabrikën “Kosovatex”, ka thënë për gazetën “Zëri” se kjo fabrikë, sipas kontratës me Agjencinë Kosovare të Privatizimit, ka pasur për obligim që deri në fund të gushtit të investojë në zhvillim, që sipas tij, shuma e mjeteve është tejkaluar.

“Janë bërë mbi 5 milionë euro investime, ndërsa në bazë të marrëveshjes së zotimit, kemi pasur për detyrë t’i investojmë 4 milionë euro”, ka thënë ai.

Po ashtu edhe zotimi i punësimit është plotësuar në tërësi. Sipas Ejupit, aktualisht me kontrata të rregullta kanë rreth 300 veta. Deri në fund prillit të vitit të ardhshëm ky numër do të dyfishohet, ndërsa deri në fund të vitit të ardhshëm pritet që të arrijmë numër katërshifror të të punësuarve.

Me prodhimin e xhinseve për eksport, sipas Ejupit, kjo fabrikë synon të bëhet qendër e industrisë tekstile në Ballkan.

“ ‘Kosovatex’ do të bashkëpunojë me klientë ndërkombëtarë, duke përfshirë edhe brende të njohura botërore si: Hugo Boss, Diesel, Levi’s, Replay, Otto Kern, Mustang, Pierre Cardin etj “, ka theksuar ai.

Ejupi ka bërë të ditur se tashmë janë në fazën e kompletimit të procesit teknologjik. Pas përfundimit të këtij procesi brenda ditës do të prodhohen 4000 njësi.

“Planifikojmë që nga dhjetori i sivjetmë do të kompletojmë të gjitha fazat teknologjike dhe të fillojmë prodhimin për eksport “, ka shtuar ai.

Kamal Canakapalli, drejtor ndërkombëtar në “Kosovatex”, ka thënë se kanë bërë një fabrikë të klasit botëror në industrinë e konfeksioneve.

“Janë instaluar pajisje të fjalës së fundit të teknologjisë, e cila do të mundësoj prodhimtari efikase me kualitet të lartë. Kemi makinën për prerje automatike të konfeksioneve, të firmës së njohur franceze ‘Lectra’ që mundëson precizitet dhe efikasitet të lartë. Jemi të parët në regjion që kemi një makinë të tillë”, ka thënë ai, duke shtuar se linjat e prodhimit po kompletohen me makina automatike dhe teknologjinë e fundit për ngjyrosje dhe larje.

Sipas drejtorit Ejupi, sivjet do të arrijnë që në treg të nxjerrin 75-80 mijë palë xhinse, ndërsa në vitin 2011, kur do të punohet me kapacitet të plotë, volumi i prodhimtarisë do të arrijë 500 mijë palë xhinse.

“Xhinset që do të prodhohen te ne, do të kenë cilësi të pranueshme për tregun ndërkombëtar”, ka potencuar ai.

Ejupi ka thënë se synojnë që rreth 80 për qind të prodhimit ta eksportojnë në tregun e Bashkimit Evropian (BE), përkatësisht në Gjermani, Austri, Itali dhe Spanjë. Ndërsa 20 për qind e tregut do të jetë në Evropën Qendrore dhe në vendet e rajonit.

Edhe standardi i menaxhimit, sipas tij, është duke u ndërtuar mbi praktikat më të njohura nga fusha në fjalë, duke veçuar njësinë e kontrollit të kualitetit. Një ekip i kontrollit vjen nga Gjermania dhe në mënyrë të vazhdueshme mbikëqyrë procesin e prodhimit.

Ejupi jep shpresë edhe për aktivizimin e linjave për prodhimin e tjerrit, por thekson se paraprakisht duhet të ndryshohet teknologjia. Mirëpo, ekspertët e kompanisë kanë konstatuar se për prodhimet e mëhershme nuk ka më treg, prandaj është dashur të orientohen kah projektet e reja.

“Është dashur të hulumtohen projekte që sjellin fitim dhe krijojnë punësim. Këtë shans e kemi gjetur te prodhimi i xhinseve”, ka thënë Ejupi.

Ndërmarrja shoqërore “Kosovatex” është privatizuar me spin-off special, në gusht të vitit 2006. Blerësi ka pasur obligim të investojë 4 milionë euro dhe të punësojë 200 punëtorë. Investimi është tejkaluar për 1 milion, kurse në mot do të ketë numër katërshifror të të punësuarve.