Prishtinë. Ndonëse lavdërohen se Kosova është e pasur me rezerva të mëdha të thëngjillit, kur duhet të arsyetohen harxhimet milionëshe për import të thëngjillit, zyrtarët e Qeverisë thonë se thëngjilli i blerë është më i mirë sesa ai i Kosovës. Vetëm këtë vit Kosova ka importuara thëngjill në vlerë prej 5.3 milion euro.

Blerim Rexha, zëvendësministër i Energjisë dhe Minierave thotë se rezervat e thëngjillit në Kosovë janë të verifikuara shkencërisht dhe të njohura ndërkombëtarisht, por që parametrat e tij nuk janë si të thëngjillit të importuar.

“Kosova nuk ka bërë biznes me thëngjill, sepse ajo është fokusuar që thëngjillin ta shfrytëzoj për prodhim të energjisë elektrike. Mirëpo edhe thëngjilli i Kosovës nuk i ka parametrat sikurse thëngjilli që importohet”, ka thënë Rexha.

Sipas tij, thëngjilli në Kosovë është importuar nga kompanitë private për nevoja të tyre dhe jo për KEK-un. “Ky thëngjill mund të jetë importuar nga kompani private në Kosovë për nevoja të tyre për djegie, por jo nga Korporata Energjetike e Kosovës për prodhim të energjisë elektrike”, ka shtuar ai.

Sipas të dhënave të Shërbimit Doganor të Kosovës, nga janari i këtij viti e deri në fund të gushtit, Kosova ka importuar hiq më pak se 71 milionë e 310 mijë kilogram thëngjill, vlera e të cilit është 5 milionë e 314 mijë euro.

Importi më i madh i thëngjillit në Kosovë gjatë vitit 2009, por edhe gjatë vitit 2010 është nga Indonezia. Ekspertët vlerësojnë se importi i thëngjillit nga shtetet tjera të botës dëmtojnë në masë te madhe imazhin e Kosovës, por edhe demantojnë të dhënat së Kosova është ndër shtetet më të pasura me rezerva të lignitit në Evropë.

Vetëm nga Indonezia, Kosova ka importuar hiq më pakë se 45 milionë e 612 kilogramë me vlere prej 3 milionë e 976 mijë euro. Nga Maqedonia është importuar 18 milionë e 228 mijë kilogram thëngjill në vlerë prej 766 mijë euro, nga Mali Zi, 6 milionë kilogram në vlerë prej 455 mijë euro, nga Bullgaria 1,1 milionë kilogram në vlerë 65 mijë euro.

Kurse sasi më të vogla Kosova ka importuar edhe nga Serbia, Bosnja, Gjermania, Italia, Polonia dhe Hungaria.

Ish- ministri i Energjisë dhe Minierave Ethem Çeku thotë se është befasuar kur ka kuptuar se Kosova importon thëngjill.

Sipas tij, importi i thëngjillit i krijon Kosovës një imazh jo të mirë pasi që sipas tij është thënë gjithmonë dhe thuhet ende se Kosova është shtetit me rezervat më të mëdha të thëngjillit në Evropë. “Është e palogjikshme të importohet thëngjill me rezervat që i ka Kosova”, ka thënë Çeku.

Pasuritë e mëdha që ka Kosova më thëngjill i dëshmon edhe interesimi i kompanive të huaja për ta nxjerr atë.

Këto ditë është mësuar se krahu energjetik i importuesit më të madh indian të qymyrit, “Adani Power Ltd.”, është futur në listën e ngushtë për të konkurruar për një projekt termal energjetik prej 1.238 megavat dhe për të drejtat e nxjerrjes së qymyrit në Kosovë, ka bërë të ditur një zyrtar.

“Adani Power” dhe krahu i saj indonezian “PT Adani Global” janë në mesin e katër grupeve të përzgjedhura nga qeveria kosovare për të konkurruar për ndërtimin e dy njësive me qymyr prej 560 megavat dhe 678 megavat, dhe për nxjerrjen e karburantit për shfrytëzim nga uzinat, ka thënë Ravi Sharma, zyrtar i lartë operativ në “Adani Power”.