Prishtinë. Antenat e operatorëve ilegalë të telefonisë mobile vazhdojnë të mos konfiskohen nga Autoriteti Rregullativ i Telekomunikacionit (ART), pavarësisht kërcënimeve të vazhdueshme të kësaj të fundit se do ta bëjë një gjë të tillë. Deri më tash ART ka hequr dhe konfiskuar 30 stacione bazë, prej nga janë shpërndarë valët e këtyre operatoreve, por edhe 23 të tjerë vazhdojnë të jenë në funksion të operatorëve ilegalë.

Po ashtu, një numër i konsiderueshëm i stacioneve gjenden edhe në pjesën veriore të Kosovës, ku deri më tash ART-ja nuk është munduar fare që t’i eliminojë ato.

Ekrem Hoxha, kryetar i bordit të ART-së, thotë se janë duke punuar në vazhdimësi për heqjen e këtyre stacioneve.

Ai thotë se më 30 korrik i kanë bërë matjet e fundit, ku kanë verifikuar se 23 stacione edhe më tej janë në shërbim të veprimtarisë ilegale. Sipas tij, pesë nga stacionet kryesore që janë duke punuar kanë një rreze veprimi deri në 30 kilometra.

“ART-ja është duke bashkëpunuar me faktorët ndërkombëtarë në Kosovë, që sa më shpejtë të largojë këto stacione të mbetura. Janë disa ngjarje që ndalin pak intensitetin e punës, por nuk e ndalin qëndrimin dhe vendimin tonë për eliminimin e çdo stacioni të operatoreve ilegalë në Kosovës”, tha ai.

Sipas tij, aktualisht stacionet e mbetura janë të vendosura në shtëpi private, por edhe toka publike. Hoxha thotë se gjatë konfiskimit thuajse çdoherë kanë pasur rezistenca nga pronarë të objekteve, ku janë të vendosura ato, por, sipas tij, ART-ja asnjë herë nuk ka pasur kompromis me ta, sepse dëmi nga këto stacione është i madh si për shtetin, ashtu edhe për operatorët e licencuar në Kosovë.

“Heqja e këtyre stacione është me interes nacional”, shtoi ai.

Nga ana tjetër, përfaqësues të partive opozitare akuzojnë ART-në për neglizhencë në heqjen e stacioneve të operatoreve ilegalë.

Myzejene Selmani, kryetare e Komisionit Parlamentar për Ekonomi, nga radhët e Aleancës Kosova e Re thotë se ART-ja thuajse nuk ka bërë asgjë në heqjen e stacioneve të operatoreve ilegalë në Kosovë. Sipas saj, të gjithë operatoret ilegalë veprojnë në Kosovë pa u penguar nga askush.

“ART-ja ka pasur përkrahjen e fuqishme të Komisionit Parlamentar për heqjen e operatoreve ilegalë, por ndërkombëtarët dhe zyrtarë të Qeverisë së Kosovës e kanë përkrahur ART-në që të mos marrë veprime në heqjen e stacioneve”, tha ajo.

Ajo tha se deri më tash ART-ja ka hequr në mëngjes stacionet dhe antenat e operatoreve ilegalë, ndërkaq në mbrëmje ato janë kthyer sërish në funksion. Sipas saj, Kosova po humb mjete të konsiderueshme për shkak të lejimit të operimit të operatoreve ilegalë.

“Sikur të kishte përkrahje ART-ja, këto stacione i kishte larguar vetëm për një ditë, sepse dihet saktë ku janë”, shtoi ajo.

Edhe Besa Gaxherri, deputete nga radhët e Lidhjes Demokratike e Dardanisë, thotë se politika është duke i mbajtur me sinjale këto stacione të operatoreve ilegalë në Kosovë.

Sipas saj, krimi i organizuar në të cilën janë të përfshirë zyrtarë të Qeverisë nuk i heqin këto antena, të cilat në masë të madhe e dëmtojnë operatorin publik mobil në Kosovë.