Prishtinë. Kuvendi i Kosovës nuk e ka diskutuar fare kërkesën e bordit të Bankës Qendrore të Kosovës (BQK) për shkarkimin e guvernatorit Hashim Rexhepi, i cili është arrestuar më 23 korrik të këtij, si i dyshuar për korrupsion, shpërlaje parash, shmangie të tatimit etj.

Kryesuesi i seancës, Xhavit Haliti, tha se e ka shtyrë diskutimin e kësaj pike, përkundër ankesës së deputetëve të Kuvendit të Kosovës. Haliti thotë se kjo pikë e rendit të ditës do të diskutohet edhe një herë të martën (sot) në kryesinë e Kuvendit të Kosovës.

Por, ky veprim i kryesuesit ka ngritur reagim te deputetët e pranishëm në seancë.

Nait Hasani, deputet i Kuvendit të Kosovës, tha se është i zhgënjyer nga heqja e kësaj pike nga rendi i ditës. Sipas tij, kryesuesi i seancës e ka hequr ketë pikë të rendit të ditës pas presioneve që ka marrë nga kryeministri, ministri, por edhe përfaqësues të bashkësisë ndërkombëtare që veprojnë në Kosovë.

“Ata që mbrojnë guvernatorin nga të gjitha ato akuza që janë ngritur kundër tij janë të përfshirë në krim të organizuar. Është e palogjikshme që Kuvendi ta heqë atë pikë të rendit të ditës me arsye të kota”, tha ai.

Hasani thotë se Kuvendi i Kosovës është organ i cili e emëron guvernatorin dhe sipas tij, ai po ashtu ka të drejtë ta shkarkojë atë kur ai shkel rregullat dhe abuzon me postin që mban.

Sipas tij, arsyetimet e kryesuesit te seancës se kërkesa është bërë në bazë të ligjit të vjetër e jo të ri, janë arsye dhe justifikime të paqëndrueshme dhe paarsyeshme.

“Personi i përfshirë në afera dhe krime dënohet në bazë të çdo ligji. Këto janë arsye të kota”, tha ai.

Pas përfundimit të hetimeve, shkarkimi

Myzejene Selmani, kryetare e Komisionit Parlamentar për Ekonomi, tha se në bazë të Ligjit të ri praktikave dhe ligjeve ndërkombëtare, guvernatori nuk mund të shkarkohet pa u përmbyllur procesi hetimor kundër tij.

Ajo tha se kjo pikë është tërhequr nga rendi i ditës deri në përmbylljen e hetimeve. Edhe burime të gazetës brenda bordit të BQK-së thonë se kërkesa e parë drejtuar Kuvendit të Kosovës për shkarkimin e guvernatorit ka qenë e bazuar në ligjin e vjetër.

Ai tha se bordi do të mblidhet sërish të hënën pasdite dhe do të marrë një vendim tjetër në bazë të ligjit të ri.

“Kërkesa për shkarkimin e guvernatorit, të cilën ia ka bërë bordi ka qenë e bazuar në ligjin e vjetër dhe Kuvendi nuk e ka shqyrtuar fare”, tha burimi i gazetës brenda bordit të BQK-së.

Çka parasheh ligji

Neni 21 i ligjit të ri për Bankën Qendrore të Kosovës thotë se çdo anëtar i Bordit drejtues shkarkohet nga bordi, apo nga Kuvendi, nëse është dënuar për kundërvajtje për të cilën shqiptohet dënim me burgim, pa mundësi të shqiptimit të gjobës, është përfshirë si debitor në procedurë të bankrotimit, apo falimentimit, për shkak të sjelljeve të këqija personale, është skualifikuar, apo suspenduar nga ushtrimi i profesionit nga autoriteti kompetent, ose nga shumica e anëtarëve të Bordit drejtues është konstatuar se është përgjegjës për angazhim në veprimtari që nuk janë në përputhje me standardet dhe ndershmërinë, ose është i papërshtatshëm për anëtar të Bordit drejtues.