Prishtinë. Sigurimi i ngrohjes për sezonin e dimrit do t’iu kushtojë më shtrenjtë kosovarëve për shkak të ngritjes së çmimit të lëndëve djegëse. Çmimi i një metri kub dru është shtrenjtuar për 10 euro, krahasuar me vitin e kaluar.

Një metër kub dru aktualisht shitet prej 40-45 euro, ndërsa ky çmim gjatë javëve në vijim mund të pësojë edhe ngritje. Ngritje të çmimit pritet të pësojë edhe qymyri, të cilin shumë qytetarë e shfrytëzojnë për ngrohje.

Fadil Halili, shitës i drurëve, thotë se ngritja e çmimit ka ardhur pasi që nuk ka sasi të mjaftueshme të drurit për djegie, me ç’rast edhe furnizuesit e kanë ngritur çmimin.

“Furnizuesit na i kanë ngritur çmimet për shkak se ata thonë se ka mungesë të drurit për djegie dhe për shkak se nxjerrja e drurëve bëhet në vende të papërshtatshme”, ka thënë Halili.

Ndërsa Nasuf Berisha, shitës i qymyrit, i cili në kamionin e tij kishte afër 2.5 metër kub qymyr thotë kjo sasi e qymyrit kushton 65 euro. Ai ka thënë se këtë vit çmimi i qymyrit pritet të jetë edhe më i lartë, pasi që është ngritur kostoja e transportit dhe është ngritur çmimi i qymyrit nga furnizuesit.

“Nuk mund të mos e ngremë çmimin e qymyrit, pasi që edhe në vend ku e marrim na është shtrenjtuar. Po ashtu edhe derivatet janë më të larta që po na e bën më të lartë koston e transportit”, është shprehur Berisha.

Ftmir Hyseni nga Prishtina ankohet se çmimi prej 45 euro për një metër kub dru është shumë i lartë.

“Për këtë sezon të dimrit, për ne çmimet për dru dhe thëngjill janë të papërballueshme, kështu që na mbetet të gjejmë alternativa tjera. Ndoshta ngritja e këtyre çmimeve do të bëjë që gjatë dimrit të ngrohemi me energji elektrike, nëse do ta kemi atë, edhe pse kjo zgjidhje s’është aspak e mirë”, ka potencuar ai.

Ndërsa zyrtarë të ngrohtores së kryeqytetit “Termokos” kanë thënë se për këtë sezon ende nuk janë caktuar çmimet e ngrohjes për metër katror. Zëdhënësja e ngrohtores “Termokos”, Zana Efendia, ka thënë se Zyra e Rregullatorit për Energji Elektrike (ZRrE), e cila është përgjegjëse për përcaktimin e çmimeve, ende nuk i ka caktuar çmimet.

“Nuk mund të them asgjë në lidhje me çmimet e ngrohjes, pasi që ende nuk na i kanë dërguar të dhënat ZRrE-ja”, ka potencuar ajo.

Mirëpo vitin e kaluar çmimi i ngrohjes për konsumatorët shtëpiakë ka qenë 0.78 euro për metër katror, ndërsa për konsumatorët komercialë dhe institucionalë ka qenë 0.92 euro për metër katror.

Qytetarët ankohen edhe për tarifat e larta për ngrohje që i aplikon “Termokosi”. Ismajli nga Prishtina thotë se ngrohtorja duhet t’i ulë çmimet , sepse, siç thotë ai, janë tepër të larta.

Fadil Behrami, profesor, thotë se do ta ketë vështirë të sigurojë lëndë djegëse për ngrohje, pasi që sipas tij, këtë vit çmimi i drurëve dhe qymyrit është tejet i lartë. Ai ka thënë se nëse krahasohet paga mesatare e një qytetari të Kosovës dhe shpenzimet që i ka për një vit është në disproporcion.

“Edhe shtrenjtimi i drurëve edhe i qymyrit ndikon negativisht tek konsumatorët, sepse ne ngrohemi kryesisht me dru ose qymyr, pasi të gjithë Kosovën ‘Termokosi’ nuk e furnizon me ngrohje dhe shtrenjtimi i lëndëve djegëse do të na detyrojë t’i lëmë disa gjëra tjera mangët”, ka thënë ai.