Sindikata e Pavarur e Punëtorëve të Postës dhe Telekomit të Kosovës (PTK) i ka falënderuar deputetët e Kuvendit të Republikës së Kosovës për mbështetjen që u kanë dhënë për mosprivatizimin e PTK-së.

Ata kanë thënë se PTK-ja është ndërmarrje publike strategjike, pasuri e të gjithë qytetarëve të Kosovës, ku pa një transparencë dhe analizë të mirëfilltë nuk mund të miratohet Strategjia për Privatizimin e PTK-së.

“Mos privatizimi i PTK-së, na ka dhënë forcë dhe kurajë që në të ardhmen të ecim në rrugën tonë, e cila është në interes të qytetarëve, kompanisë dhe të punësuarve të saj”, ka thënë Milazim Alshiqi, kryetar i Sindikatës së Pavarur të Punëtorëve të PTK-së, i cili ka thënë se pa një transparencë dhe analizë të mirëfilltë nuk mund të miratohet Strategjia për Privatizimin e PTK-së.

“Nuk e kanë bërë një ekspertizë, një analizë të rëndësishme se cili është fitimi që vjen nga privatizimi i PTK-së, nuk kanë bërë debate me ekspertë të lëmenjve të caktuar, me shoqërinë civile, me sindikata që ta argumentojnë këtë që thonë”, ka thënë ai, duke shtuar se kjo sindikatë do t’u ofrojë argumente që privatizimi i saj të mos ndodhë.

Po ashtu kjo sindikatë ka kërkuar nga Qeveria në largim, që t’i anulojë vendimet e mbetura që lidhen drejtpërdrejt me funksionimin dhe zhvillimin e PTK-së, sepse sipas tyre, ndalja e projekteve për zhvillimin e infrastrukturës së kësaj kompanie ka dëmtuar PTK-në, qytetarët dhe shtetin e Kosovës.

Alshiqi ka kërkuar se nuk duhet të privatizohet PTK-ja për deri sa nuk nxirret ligji i veçantë për privatizimin e saj, të bëhet nënshkrimi i kontratave kolektive dhe të nxirret ligji i asistencës.

“Këto duhet të gjitha të rregullohen dhe pastaj në një të ardhme jo të afërt të shqyrtohet se cili është fitimi i procesit të Privatizimit të PTK-së”, ka thënë ai.

Ai ka thënë se të gjitha ndërmarrjet shoqërore që janë privatizuar deri tani nuk kanë dhënë rezultatet e pritshme se do të ketë shtim të numrit të punëtorëve, do të ketë shtim të të hyrave, por mbi 90 për qind e ndërmarrjeve shoqërore që janë privatizuar kanë dështuar.

Alshiqi ka thënë se në mesin e sindikatës kanë ekspertë juridik, të cilët janë duke i kontrolluar ligjet e shteteve tjera të cilat kanë bërë privatizimin e Postës dhe se ajo përvojë të sillet në Kosovë.

“Do të marrim material, do të tentojmë që edhe deputetëve të cilët vijnë në mandatin e ardhshëm që t’ua lehtësojmë punën, mos të ketë mundësi të ndikohen nga rrymat e ndryshme, që kur të vij ligji i privatizimit të punohet në bazë të tij”, ka thënë ai.

S’kanë qasje në keqpërdorime

Sa i përket çështjes së keqpërdorimeve dhe të korrupsionit në PTK, Alshiqi ka thënë se nuk është e sindikatës, por me këtë duhet të merren organet e hetuesisë.

“Sindikata nuk është organizëm i afërt dhe nuk ka qasje në atë se nëse ndodhin keqpërdorimet e ndryshme në korporatë”, ka thënë ai.

Ai ka shtuar se si sindikatë do të jenë këmbëngulës për çështjet madhore dhe të cilat u takojnë atyre dhe popullatës, por nëse ka çështje të keqpërdorimeve duhet të merren organet e hetuesisë, e jo sindikata e punëtorëve.