Oda Ekonomike e Kosovës (OEK) ka nënshkruar një memorandum bashkëpunimi mes zyrës së Mërgatës kosovare dhe Zyrës së kryeministrit, me qëllim të involvimit të mërgimtarëve të Kosovës direkt në vendin e tyre.

Safet Gërxhaliu, kryetar i OEK-ut, ka thënë se do të jetë një bashkëpunim i veçantë në OEK, ku do të ketë forma të aplikimit të tenderëve në Kosovë, ku diaspora do të jetë e gatshme të aplikojë në këtë drejtim dhe do të organizohen mbrëmje të produkteve kosovare.

“Ne do të japim informata dhe do të fillojmë promovimin e produkteve tona ku ata jetojnë, po ashtu atyre tani e tutje u jepet mundësia për marrjen e tenderëve nga atje”, ka thënë ai.

Ai ka përmendur se kjo mërgatë në vendet gjermanofolëse dhe në Amerikë ka dhënë shumë për Kosovën gjithmonë dhe e ka ndihmuar shumë Kosovën, “prandaj ne tani po u japim shumë më shumë mundësi atyre”. Sipas Gwrgjaliut dhe OEK-ut, tanimë mërgata nuk do ta ndiejë mungesën e largësisë që e kanë për Kosovën, ata tani janë të lidhur ngushtë me vendin e tyre dhe u krijohen shumë mundësi më të mira për bashkëpunim.

“Ne me këtë marrëveshje po ua kthejmë respektin që u takon bashkatdhetarëve tanë, të cilët kanë dhënë shumë për këtë vend”, ka thënë Gërxhaliu.

Naim Dedushaj, nga Zyra e Mërgatës në kuadër të Zyrës së kryeministrit të Republikës së Kosovës, e ka vlerësuar lart nënshkrimin e memorandumit, i cili është një mundësi e mirë për të ikorporuar biznesin jashtë Kosovës.

“Ne po mundohemi t’u jemi mirënjohës mërgatës për kontributin e tyre të dhënë deri më tani në shumë fusha”, ka pohuar ai.

Ai ka shtuar se po punojnë konkretisht për mundësinë e afrimit të tyre me Kosovën, që ata të kenë mundësi shumë më të mëdha me zhvillimet në Kosovë, por njëkohësisht do të bëjnë promovim të produkteve në vendet ku ka shumicë shqiptare.