(E plotësuar) Më shtrenjtë servisimi se vetura. Kjo gjë i ka ndodhur ministrit të Financave, Bedri Hamza, i cili para dy muajve i ka dhënë tenderin në vlerë prej 54 mijë e 830 euro kompanisë “ Mercedes-Benz “ nga Prizreni, për servisimin dhe mirëmbajtjen e dy veturave zyrtare “Mercedes” për tre vjetët e ardhshme.

Të njëjtat vetura, më 6 prill 2010, i kishte blerë ish-ministri i Financave, Ahmet Shala. Një për vete dhe një për zëvendësin e tij në atë kohë, Bedri Hamzën, i cili tashmë është në krye të kësaj ministrie.

Këto dy vetura ish-ministri Shala i kishte paguar për hiç më pak se 98 mijë e 400 euro në tenderin që e kishte fituar kompania “BAAF” nga Prizreni.

Mirëpo, për vetëm një vit e gjysmë në qarkullim, Ministria e Financave është detyruar ta japë tenderin për servisim dhe mirëmbajtje të këtyre veturave.

Në kushte normale veturat e reja kanë garanci prej tre vjetësh, ndërsa veturave të Ministrisë së Financave i është dashur t’i paguhet servisimi vetëm pak kohë pas shfrytëzimit.

Ndonëse në kohën kur janë blerë këto vetura, çmimi i tyre prej rreth 100 mijë eurosh ishte arsyetuar kinse veturat janë të reja dhe të sigurta. Mirëpo, me servisimin e këtyre veturave zyrtarët e kësaj ministrie e arsyetojnë me faktin se ato nuk kanë qenë të reja, por të përdorura.

Veturat nuk ishin të reja

Edhe ministri i Financave, Bedri Hamza, konfirmon për “Zërin” se veturat e blera nga paraardhësi i tij në krye të ministrisë nuk kanë qenë të reja. “Veturat nuk kanë qenë të reja. Dy vetura na kanë kushtuar më pak se 100 mijë euro”, shprehet Hamza.

Ai thotë se asnjëherë nuk është përzier në punët e departamentit të prokurimit, por ka kërkuar në vazhdimësi zbatim të ligjit. “Po të them sinqerisht se nuk përzihem në punët e prokurimit.

Nga ata kërkoj vetëm zbatim të ligjit”, shprehet Hamza, duke shtuar se nëse në këtë rast vërtetohet se nuk është zbatuar ligji, atëherë do të marr masa të menjëhershme ndaj përgjegjësve.

Ndërsa Elmaze Xhema, nga Zyra e Prokurimit në Ministrinë e Financave, thotë se në tenderin për Servisimin dhe Mirëmbajtjen e veturave “Mercedes”, kanë konkurruar tre kompani, ku, sipas saj, kompania që ka ofruar ofertën më të lirë iu është dhënë tenderin për servisimin dhe mirëmbajtje, pasi që tenderi i përgjegjshëm me çmim më të lartë kishte arritur në 65 mijë euro.

Sipas saj, shuma totale e tenderit është e paraparë për të gjitha pjesët e mundshme të veturës “Mercedes”.

“Kontrata s’është fikse”

Pavarësisht se në kontratë thuhet decidivisht se vlera totale e tenderit është prej 54 mijë e 830 euro, Xhema pohon se pas tre vjetëve, shuma e mjeteve të shpenzuara mund të jetë shumë më e vogël se vlera e paraparë, apo edhe mund ta tejkalojë atë që parashihet në kontratë.

“Këtu parashihet servisimi për të gjitha pjesët e veturave. Ndërkaq, Ministria i paguan vetëm ato pjesë që i ndërron, sepse nuk ka nevojë që brenda tre vjetëve të ndërrohen të gjitha pjesët e mundshme të veturës”, tha ajo.

Xhema nga Zyra e Prokurimit në një farë mënyrë mundohet të arsyetojë çmimin e lartë të kontratës, pasi që, sipas saj, pjesët e veturës “Mercedes” janë shumë të shtrenjta, krahasuar me pjesët e veturave tjera.

“’Mercedes’ i ka do rripa që i prishen shpesh, por edhe kushtojnë shumë shtrenjtë”,tha ajo. Sipas saj, vetëm ndërrimi i vajit të një veture të tillë Ministrisë së Financave i ka kushtuar hiq më pak se 200 euro.

Pavarësisht se dy vetura Ministria ka blerë për 94 mijë euro, zyrtarja e prokurimit thotë se ato vetura nuk janë blerë të reja për shkak të çmimit shumë të lartë. “Nëse nuk gaboj veturat janë të prodhuara në vitin 2007. Sepse sikur ato të kishin qenë të reja do të kishin garanci tre vjet”, shtoi ajo.

Përndryshe, javën e kaluar gjiganti gjerman i automobilave “Daimler” ka konfirmuar edhe zyrtarisht se kompanitë private (përfaqësuesit e autorizuar) nuk mund t’iu shesin vetura “Mercedes” nëpërmjet tenderëve publikë institucioneve të Kosovës prej janarit 2012.

Konfirmimi nga prodhuesi i veturës “Mercedes” kishte ardhur vetëm disa ditë pasi që gazeta “Zëri” kishte shkruar se tash e tutje veturat mund të blihen vetëm me një leje të posaçme nga prodhuesi, ose në negociata të drejtpërdrejta me përfaqësuesit e kompanisë nga Gjermania.

Një vendim të tillë “baba” i veturave simbol të kualitetit dhe qëndrueshmërisë e ka marrë për shkak të shkallës së lartë të korrupsionit në Kosovë, të cilën gjë e potencon edhe “Transparency International” në raportet e publikuara.

Ute West von Vellberg, menaxher i lartë për komunikime, integritet dhe çështje ligjore në “Daimler Ag” në Shtutgard të Gjermanisë, ka theksuar për gazetën “Zëri” të hënën se kompania e tyre aderon në mënyrë strikte dhe në përputhje me parimet e integritetit në të gjithë botën.

Ai sqaron se kanë vendosur me Kosovën të bëjnë biznes vetëm si transaksione të drejtpërdrejta, e cila gjë, sipas tij, garanton një shkallë të lartë të transparencës në proceset biznesore.

“Ne kemi vendosur të bëjmë biznes me institucionet qeveritare dhe organizatat ndërkombëtare vetëm si transaksione të drejtpërdrejta me një numër vendesh, ku përfshihet edhe Kosova. Kjo na garanton një shkallë të lartë të transparencës në proceset biznesore”, ka nënvizuar Vellberg nga“Daimler”.