Tarifat e rrymës, ujit, pastrimit dhe ngrohtores me kursime maksimale kalojnë 100 euro në muaj për një familje të vogël në Kosovë, derisa paga mesatare sipas Entit të Statistikave të Kosovës kap 374 euro. Ndërkaq mbi 40 për qind e popullatës e regjistruar si e papunë dhe me pensione qesharake si dhe çmimi i lartë i shërbimeve komunale në krahasim më standardin e kosovarit bëjnë që të rritet kriza dhe të rëndohet dita e ditës jetesa në Kosovë.

Mesatarisht një familje paguan rreth 50 euro në muaj rrymë, fatura e ujit është rreth 10 euro, pastrimi 4.80 euro, kurse për ngrohje tarifohen 1 euro për metër katror. Qytetarët e Kosovës kanë nisur të ballafaqohen me mbijetesën, shumë prej tyre ankohen se nuk e dinë se si mund të kalojnë muajin me gjithë këto tarifa të shërbimeve komunale.

Ahmet Salihu, banor i Prishtinës, tregon se 50-60 euro paguan për rrymë, ujë e bërllok.

Ai ka thënë se gjatë sezonit dimëror, kur fillon edhe ngrohja qendrore, ai duhet të paguajë edhe rreth 40 euro më shumë në muaj për ngrohje.

“Bërlloku ka tarifë fikse, që është 4.80, ndërsa fatura e ujit vjen paushall, ndonjëherë 10 euro ndonjëherë 9 kurse për rrymë nuk ndodh të vijë më pak se 30 euro”, ka thënë ai.

Ai ka shtuar se për të hyrat që sigurojnë shumica e familjeve në vend, këto shuma janë vështirë të pagueshme, pasi që, sipas tij, shumica e familjeve kanë vetëm një anëtar të punësuar.

Selman Halimi, nga Prishtina, ka thënë se të hyrat që ka familja e tij, është e pamundur t’i paguajë të gjitha shpenzimet.

Ai ka thënë se shpeshherë mbetet pa paguar rryma, apo uji.

“Më mbeten pa paguar shpeshherë rryma ose bërlloku, ngase kemi vetëm një anëtar të familjes që punon dhe është e pamundur të mbulohen të gjitha shpenzimet”, është shprehur ai.

Besim Musatafa nga Gjilani, ka thënë se këto shpenzime përveç rrymës nuk janë të shtrenjta. Ai ka thënë se për ujë nuk ndodh të kalohet 3 euro, e po ashtu edhe për bërllok, është shumë e ulët. “Vetëm rryma që është prej këtyre obligimeve më e shtrenjtë, por jo uji e bërlloku”, ka treguar ai. Krahasuar me vendet e rajonit, bazuar në statistikat e ESK-së, Kosova nuk radhitet e fundit.

Pas Kosovës janë Serbia, ku në fund të muajit maj paga mesatare ishte 353 euro për Serbinë ndërsa për Maqedoninë, 330 euro.

Ndërsa më mirë se Kosova qëndron Shqipëria ku paga mesatare është afër 400 euro, në Slloveni 970 euro, Kroaci 736 euro, Mal të Zi 581 euro dhe në Bosnjë e Hercegovinë 400 euro. Sipas ESK-së, pagë nga buxheti i Kosovës marrin 77 mijë e 602 punëtorë, kurse në fund të qershorit të vitit paraprak ishin 76 mijë e 335.