Zhbllokimi i projekt planit të investimeve kapitale për vitin 2012, në vlerë prej mbi 30 milionë eurosh për Postë-Telekomin e Kosovës (PTK), dhe propozimi i tij për ulje të shpenzimeve në këtë ndërmarrje nga ana e ministrit të Zhvillimit Ekonomik, Besim Beqaj, është vlerësuar i vonuar nga ekspertët e ekonomisë.

Vendimi i tanishëm ministrit të Zhvillimit Ekonomik, është thënë se është duke u bërë pikërisht përpara privatizimit të ndërmarrjes për t’ia rregulluar terrenin blerësit të kësaj ndërmarrjeje publike. Lumir Abdixhiku, drejtor në institutin “Riinvest”, ka thënë për “Zërin se këto veprime janë kërkuar shumë vite më parë.

Ai ka thënë se vazhdimisht është kërkuar nga Qeveria që të bëjë këto zhbllokime të investimeve, e të ulë numrin e mbipunësimeve në këtë ndërmarrje. Sipas tij, këto veprime rrisin vlerën e shitjes së PTK-së, pasi që ka të mbipunësuar në këtë ndërmarrje e nuk ka pasur investime tani e disa vite. “Tani është mirë që privatizimi të shtyhet, pasi që efekti i investimeve vërehet më vonë” , ka thënë Abdixhiku.

Ai ka shtuar se kjo është dashur shumë më herët të ndodhë, sipas tij, tani është shumë vonë për të pasur efektin e vet, vetëm nëse shtyhet privatizimi. Avni Zogiani, drejtues i organizatës joqeveritare “Çohu”, ka thënë se ulja e pagave dhe shpenzimeve të PTK-së, përkatësisht zhbllokimi i investimeve është dashur të ndodhë më parë. Ai ka thënë se në vazhdimësi është dëmtuar PTK-ja me bllokimin e investimeve që është bërë nga ana e Qeverisë, duke e bërë që PTK-ja të mos jetë as konkurrente me operatorët tjerë të vendit.

Ai ka shtuar se me këto veprime që janë ndërmarrë, do të ketë ndikim në rritjen e vlerës së kësaj ndërmarrjeje. Mirëpo, sipas tij, kjo Qeveri me këto veprime për ulje të shpenzimeve të PTKsë po tenton që të mbledhë sa më shumë devidenta për të mbuluar vrimat që ka hapur. “Problemi i privatizimit të PTK-së është shumë i madh. Po bëhet fjalë për një Qeveri e cila po determinohet nga privatizuesi”, është shprehur Zogiani.

Ai këto veprime i konsideron se Qeveria po tenton që të përfitojë sa më shumë brenda një kohe shumë të shkurtër. Edhe kryetari i Federatës së Sindikatës të Pavarur të PTK-së, Milazim Alshiqi, këto veprim i ka konsideruar se Beqaj po ia ndreq “terrenin” privatizuesit të ardhshëm. Ai ka thënë se është dashur edhe vitet paraprake të lejohen investimet.

“Përfituesit më të mëdhënj në këto situata, janë individët, ndërsa më së shumti dëmtohet buxheti i shtetit”, ka thënë Alshiqi. Ndërkaq, zyra për komunikim me media e MZHE-së, ka thënë se miratimi i zhbllokimit ka ardhur duke u arsyetuar nga Bordi i PTK-së si i nevojshëm dhe i domosdoshëm.