Ulja e kundërvajtjeve doganore nga 5000 euro sa ishte minimumi, në 500 euro tash, u ka dhënë më shumë hapësirë kontrabanduesve që të vazhdojnë veprimtarinë e tyre pa ndonjë problem. Deri më tash nëse ndonjë kompani është zënë duke kontrabanduar, gjoba minimale ka qenë 5000 euro, edhe nëse vlera e produkteve të kontrabanduara ka qenë më e vogël se kjo shumë.

Por, tash e tutje nëse një kompani zihet duke kontrabanduar, gjoba minimale do të jetë 500 euro.

Zyrtarë të Doganave të Kosovës këtë ndryshim e konsiderojnë si një sukses dhe favor për biznese, por në anën tjetër, ekspertë të ekonomisë, por edhe përfaqësues të partive opozitare në vend thonë se me ndryshimet e bëra Qeveria ka favorizuar kontrabandën dhe kompanitë që kanë kontrabanduar dhe po kontrabandojnë edhe më tej.

Drejtori i Doganave të Kosovës, Naim Huruglica, thotë se kohë më parë kanë kërkuar nga Ministria e Financave që të ulet minimumi i gjobës, pasi që, sipas tij, ajo ka qenë shumë e lartë, por edhe diskriminuese.

Sipas tij, në disa raste ka ndodhur që vlera e produkteve të kontrabanduara të jetë shumë më e vogël se minimumi i gjobës dhe nuk ka qenë në rregull që kompania të paguajë gjobë minimale prej 5000 euro. Ai thotë se një gjobë minimale aq e lartë nuk përkon as me normat e Bashkimit Evropian.

Ish-ministri i Ekonomisë dhe Financave, Haki Shatri, thotë se edhe më tej nuk e ka të qartë pse Qeveria e ka ulur kundërvajtjen doganore nga 5000 euro sa ishte minimumi, në 500 euro. Sipas tij, një veprim i tillë është i pamenduar mirë nga ata që e kanë marrë.

“Unë një gjë e di që ky vendim totalisht shkon në favor të kompanive që synojnë të kontrabandojnë mallra. Më herët ka qenë 5000 mijë euro baza minimale dhe ka qenë më e vështirë ndërkaq tash me 500 euro është shumë më e lehtë”, tha ai.

Edhe Avni Zogiani nga Organizata për Dinjitet dhe Antikorrupsion “Çohu” thotë se kjo ulje për dhjetëfish tregon se këto politika nxirren pa pasur ndonjë studim apo ndonjë shembull të ndonjë praktike të mirë.

“Këto shifra thjesht vendosen në mënyrë arbitrare dhe përgjithësisht në fushën e penaltive për shkeljet e ligjit tërë orientimi i politikave legjislative në Kosovë shkon në drejtim të uljes së dënimeve deri në masën sa bëhet më me interes shkelja dhe pagesa e dënimit se sa respektimi i ligjit. Logjikisht një dënim prej 500 eurosh motivon shmangien e doganave dhe shton mundësinë e kundërvajtjeve në këtë sektor”, tha ai.