Banka Botërore ka numëruar arsyet pse Kosova duhet të prodhojë energji me linjitin që posedon. Në një raport, i hartuar nga ekipi i firmës së konsulencës “DHInfrastructure”, dhe i rishikuar nga punonjësit e Bankës Botërore, dokument ky i cili përfshin shqyrtimin e ndikimeve mjedisore, të ndërlidhura me secilin opsion, dhe shqyrton disa kombinime të alternativave energjetike për plotësimin e kërkesave të ndryshueshme ditore dhe stinore.

“Kosova varet shumë nga importi për të përmbushur nevojat e larta sezonale dhe ato ditore.

Megjithatë, importi ndikohet nga faktorët gjeopolitikë që pengojnë disponueshmërinë e kapacitetit të transmisionit, nga bilanci i furnizimit dhe kërkesës për energji në Ballkan dhe nga kapaciteti financiar i KEK-ut për të financuar importin nga tarifat e mbledhura dhe nga ai i qeverisë për të financuar atë nga buxheti”, shkruan në raport. Aty thuhet se një linjë e re e transmisionit prej 400 kV për në Shqipëri pritet të komisionohet deri në fund të vitit 2013, gjë që do të rrisë kapacitetin e bartjes për përafërsisht 500 MW në të dyja drejtimet.

Një lidhje e re prej 400 kV me Maqedoninë gjithashtu është planifikuar, e cila do të rrisë kapacitetin e bartjes për 500 MW shtesë në të dyja drejtimet. Sa i përket kombinimit më të mirë të prodhimit të energjisë elektrike për Kosovën thuhet se për një kombinim të kapacitetit për ngarkesën bazë të shfrytëzimit të energjisë elektrike si dhe për nivelet maksimale të shfrytëzimit të energjisë elektrike me qëllim të plotësimit të kërkesës në mënyrë të vazhdueshme dhe me kosto më të ulët. “Kjo patjetër nënkupton se Kosova ka nevojë për një kombinim të opsioneve të furnizimit të cekura më lart – edhe termocentralet edhe burimet e energjisë së ripërtëritshme – dhe jo vetëm për një opsion të vetëm”, shkruan në raport.

Sipas BB-së, burimet e energjisë nga uji dhe burimet e ripërtëritshme mund të ofrojnë një pjesë të këtyre kapaciteteve të qëndrueshme; supozohet se 305 MW të kapacitetit të qëndrueshëm (që përdoret gjatë orëve kur kërkesa është më e lartë) do të mund të furnizoheshin nga hidrocentrali i Zhurit; 170 MW të tjera të kapacitetit të qëndrueshëm mund të furnizoheshin nga burimet e tjera të energjisë së ripërtëritshme (hidrocentrale të vogla, era, biomasa dhe biogazi).

“Edhe nëse këto kapacitete të ripërtëritshme do të mund të ndërtoheshin deri në vitin 2017, do të ketë një boshllëk për kapacitetin bazë të qëndrueshëm, i cili do të arrijë mesataren e 600 MW në periudhën 2017-2019, dhe rritet deri në rreth 1000 MW deri në vitin 2025”, thuhet në raport.

Kurse sa i përket opsionit të linjitit shkruan se është opsioni më i lirë termoenergjetik, edhe në rastin kur futet kostoja relativisht më e lartë e mjedisit. Sipas BB-së, ky opsion duket se i përballon devijimeve mjaft të mëdha në supozimet e bëra për ndryshimet e kërkesës, përdorimit të kapaciteteve, kostove kapitale, kostove globale mjedisore që përfshin çmimin e parashikimit të emetimeve të karbonit nga Agjencia Ndërkombëtare e Energjisë, të paraqitur në Raportin Botëror për Energji 2011 të kësaj Agjencie. Plani për shfrytëzimin e linjitit, (së bashku me hidrocentralin e Zhurit dhe me burimet e tjera të energjisë së ripërtëritshme, siç është përshkruar më lart) është më së paku i kushtueshëm, edhe sipas një parashikimi shumë më të ulët të shkallës së rritjes së kërkesës bruto për rrymë elektrike prej 2.9 për qind në vit gjatë periudhës kohore prej vitit 2010-2015.