Linjiti edhe më tej konsiderohet si opsioni më i mirë për prodhimin e energjisë në Kosovë. Për shkak të rezervave të mëdha të linjitit si duket Qeveria e Kosovës është fokusuar që përfundimisht të ndërtojë kapacitete të reja për prodhimin energjisë përmes linjitit, por pa lënë anash edhe alternativat tjera të prodhimit.

Gëzim Baxhaku, këshilltar i ministrit të Zhvillimit Ekonomik Besim Beqaj, thotë se

Kosova ka Strategjinë e Energjisë dhe me të është përcaktuar se në prodhimin e energjisë elektrike edhe me tej linjiti do të mbetet karburanti kryesor.

Sipas tij, rezervat e linjitit në Kosovë gjenden në dy basenet më të mëdha dhe janë rreth 12.5 miliardë tonë (këtu përfshihen të gjitha kategoritë e rezervave).

”Edhe pse linjiti do të jetë burim bazë për prodhimin e energjisë elektrike edhe për një kohë, fokusi i Qeverisë vazhdon të jetë edhe shfrytëzimi i Burimeve të Ripërtëritshme të Energjisë për prodhimin e energjisë elektrike përmes ndërtimit të hidrocentraleve dhe kapaciteteve të reja nga era dhe BRE-të tjera”, tha ai.

Sipas tij, po ashtu Qeveria mbetet e përkushtuar në kyçjen e Kosovës në projektet rajonale të furnizimit me gaz, siç është projekti i Unazës në Evropën Juglindore, si dhe ndërtimi me investime private i rrjetit të brendshëm për përdorimin e tij nga sa më shumë konsumatorë, kryesisht në sektorin banesor, shërbime dhe industri.

Sipas Baxhakut, në periudhën deri në vitin 2018, prodhimi i energjisë elektrike do të bëhet nga: Termocentrali ‘Kosova A’, duke operuar Blloqet A3, A4 dhe A5 të cilat mund të shfrytëzohen deri në fund të vitit 2017.

Ai tha se koha e daljes nga operimi i blloqeve të TC ‘Kosova A’ përpara fundit të vitit 2017 do të varet nga hyrja në punë e blloqeve të Termocentralit ‘Kosova e Re’.

Baxhaku tha se aktualisht është duke u punuar në finalizimin e pakos tenderuese për termocentralin e ri “Kosova e Re”, e cila pritet të finalizohet deri në fund të muajit shkurt, ku më pas do t’u dorëzohet ofertuesve të para-kualifikuar ne kuartalin e parë të këtij viti.

Por, derisa Qeveria është fokusuar drejt prodhimit të energjisë me linjit, kreu i Kuvendit të Kosovës Jakup Krasniqi është pro prodhimit të energjisë alternative.

Ai ka thënë se edhe përkundër investimeve në këto 12 vjet të fundit, KEK-u nuk ka treguar performancë të mirë. Sipas tij, Korporata Energjetike nuk ka ecur si duhet edhe përkundër investimeve që ka pasur dhe nuk ka treguar se mund të vetëfinancohet. “Prandaj shfrytëzimi i resurseve natyrore për prodhim të energjisë alternative do të thotë shumë”, është shprehur ai.

Ai ka thënë se energjia alternative është tej mase e nevojshme, e cila ka ndikim të drejtpërdrejtë në zvogëlimin e importit të rrymës e po ashtu edhe ndikim në zvogëlimin e ndotjes së ambientit. Sipas tij, duke parë që ka shumë burime të pashfrytëzuara për prodhim të energjisë së ripërtërishme, Qeveria e vendit do të mbështesë tërë këtë proces. “Gjatë 12 vjetëve janë ndjekur politika të gabuara. Ta përmbyllim këtë kapitull dhe të shfrytëzojmë të gjitha kapacitetet për të prodhuar energji alternative”, ka theksuar Krasniqi.