Ish-kryeshefi ekzekutiv i Postës dhe Telekomit të Kosovës, Shyqyri Haxha, shumë shpejt do të ulet në bankën e të akuzuarve ngase të mërkurën një gjykatës i Misionit Evropian për Sundimin e Ligjit i ka konfirmuar tri pikat e aktakuzës ndaj tij, dhe pjesërisht aktakuzën për përfaqësuesit e “Dardafon”-it.

Bashkë me Haxhën, në “bankën e zezë” do të ulet edhe kryetari i bordit të drejtorëve të Postës dhe Telekomit, Rexhë Gjonbalaj, pronarët e kompanisë “Dardafon” Blerim dhe Shkëlqim Devolli si dhe Ismet Bojku, përfaqësuesi ligjor i kësaj kompanie.

Misioni EULEX ka njoftuar të mërkurën se aktakuza është konfirmuar pjesërisht ndaj pesë të pandehurve lidhur me nënshkrimin e marrëveshjes mes PTK-së dhe kompanisë “Dardafon”, tashmë e njohur si “Z-Mobile”. Ish-drejtori i PTK-së, Shyqyri Haxha, dhe kreu i bordit të kësaj ndërmarrje publike, Rexhë Gjonbalaj, tashmë akuzohen për nënshkrimin e kësaj kontrate, e cila ka dëmtuar në masë të madhe Postën dhe Telekomin e Kosovës.

Shyqyri Haxha dhe Rexhë Gjonbalaj, sipas aktakuzës së konfirmuar nga EULEX-i, do të gjykohen për tri pika dhe atë për nga dy vepra të shpërdorimit të detyrës zyrtare dhe për një vepër të lidhjes së kontratave të dëmshme vepra këto të kryera gjatë mandatit të tyre e që janë në kundërshtim me ligjet e aplikueshme në Kosovë.

Pos tri veprave për të cilat do të gjykohen personat kyçë të Postës, në të njëjtën aktakuzë janë edhe Ismet Bojku dhe Blerim e Shkëlqim Devolli.

Tre personat pritet që të gjykohen po ashtu për tri pika të aktakuzës që kanë të bëjnë me veprën penale të mashtrimit, për veprën penale të lidhjes së kontratave të dëmshme si dhe për veprën penale të falsifikimit të dokumenteve.

Tre të lartpërmendurit, pas hetimeve të zhvilluara që nga qershori i 2010-ës e më pas, në aktakuzën e ngritur kanë qenë të akuzuar edhe për dy vepra të tjera. Mirëpo gjykatësi i EULEX-it në vendimin për konfirmim të aktakuzës i ka hedhur poshtë pretendimet e prokurorisë se Devolli e Bojku kanë kryer veprën penale të krimit të organizuar dhe atë të keqpërdorimit në besim.

Gjykatësi po ashtu në vendimin e marrë ka hedhur poshtë edhe dy pika të tjera të aktakuzës ku si persona përgjegjës akuzoheshin të jenë Haxha dhe Gjonbalaj. Për dy të fundit, gjykata ka hedhur dy pika që kanë të bëjnë me veprën penale të keqpërdorimeve të autorizimeve në ekonomi.

Ndonëse këto pika janë hedhur poshtë e tëra nuk ka përfunduar, pasi që prokurori i rastit, në afat të caktuar kohor mund të paraqesë ankesë ndaj vendimit të lëshuar të mërkurën.

Aktakuza e cila është konfirmuar të mërkurën ishte ngritur më 9 qershor të vitit të kaluar nga një prokuror i Prokurorisë Speciale të Kosovës derisa hetimet patën filluar qysh në qershor të 2010-ës nga prokurori i EULEX-it, i cili ka bashkëpunuar me Njësinë e Intelegjencës Financiare të këtij misioni.

Në kohën kur është zhvilluar ky hetim, në korrik të 2010-ës ishin bastisur edhe disa lokacione duke përfshirë edhe zyre të ndryshme në PTK.

“Gjatë bastisjeve të kryera më 15 korrik 2010, hetuesit kanë konfiskuar një sasi të madhe të materialit i cili ishte ekzaminuar nga PSRK. Ishin kryer edhe ekspertiza kyçe lidhur me provat e konfiskuara. Lidhur me këtë rast janë intervistuar një numër i dëshmitarëve”, ka njoftuar EULEX-i në lidhje me rrjedhën e hetimeve që kanë rezultuar deri tek ngritja e aktakuzës.

Gati dy vjet më parë u bastis

Në kohën kur është zhvilluar ky hetim, në korrik të 2010-ës ishin bastisur edhe disa lokacione duke përfshirë edhe zyre të ndryshme në PTK.

“Gjatë bastisjeve të kryera më 15 korrik 2010, hetuesit kanë konfiskuar një sasi të madhe të materialit i cili ishte ekzaminuar nga PSRK. Ishin kryer edhe ekspertiza kyçe lidhur me provat e konfiskuara. Lidhur me këtë rast janë intervistuar një numër i dëshmitarëve”, ka njoftuar EULEX-i në lidhje me rrjedhën e hetimeve që kanë rezultuar deri tek ngritja e aktakuzës