Safet Gërxhaliu, kryetar i Odës Ekonomike të Kosovës (OEK), është vlerësuar si inspektues i Agjencisë Kosovare të Privatizimit (AKP). Kështu ka deklaruar vetë drejtori i AKP-së, Shkëlzen Lluka, gjatë një konference të mbajtur me gazetarë gjatë ditës së mërkurë, i cili ka thënë se AKP-ja vazhdimisht informon OEK-un.

Drejtori i AKP-së ka thënë se vazhdimisht informon të parin e OEK-ut për çdo hap që ndërmerr agjencia, pasi që, sipas tij, ai e konsideron si urë lidhëse OEK-un me institucionet e komunitetit të biznesit në vend.

“Ne vazhdimisht e informojmë mbi rrjedhat dhe punën e AKP-së pasi që OEK-u është urë ndërlidhëse në mes të institucioneve të komunitetit të biznesit në Kosovë”, ka thënë Lluka.

Sipas tij, ata kanë informuar të parin e OEK-ut mbi angazhimet dhe sfidat që e presin AKP-në për këtë vit si dhe sfidat për të ardhmen.

Përkrah shumë ndërmarrjeve tjera, i pari i OEK-ut dhe drejtori i AKP-së, diskutuan për çështjen që lidhet me “Trepçën”, ku vlerësuan se kjo ndërmarrje ka nevojë për një studim për t’i parë vlerat e saj.

Lluka ka informuar Gërxhaliun se dy ditë më parë është konfirmuar edhe nënshkrimi i marrëveshjes me Ministrinë e Financave të Gjermanisë për asistencë teknike për të kryer

një studim në “Trepçë”.

“Studimi do të kryhet mbi fizibilitetin dhe një punë të cilën shpresojmë se do ta bëjmë është plani për riorganizimin dhe rivitalizimin e ‘Trepçës”, ka theksuar Lluka.

Lluka ka potencuar se kanë filluar me shpalljen e moratoriumit mbi “Trepçën”, pasi që AKPja në bazë të legjislacionit është administratori i vetëm i “Trepçës”.

“Kemi një bashkëpunim të gushtë edhe me ministritë përkatëse që merren me zhvillimin ekonomik dhe me menaxhmentin e “Trepçës”, potencoi drejtori Lluka.

Ndërkaq Gërxhaliu, ka thënë se debati lidhur me “Trepçën” është shumë i rëndësishëm për faktin se kjo minierë ka potenciale natyrore dhe rëndësi ekonomike, sociale dhe strategjike për vendin.

“Për këtë arsye kjo e ka shtyrë stafin qe vërtet të punohet në forcimin e partneritetit me donatorë nga jashtë siç janë palët nga Gjermania që më në fund të hyhet në përgatitjet për riaktivizimin e ‘Trepçës”, ka thënë ai.

Sipas tij, duhet të hartohet një strategji ose të kryhet edhe një studim fizibiliteti dhe pas përfundimit të këtij studimi do të dihet vlera reale e aseteve të “Trepçës” dhe do të vendoset forma e qasjes së “Trepçës” në të ardhmen.

Në anën tjetër, Lluka i ka rrëfyer të parit të OEK-ut edhe për hapjen e ofertave të likuidimit, dhe për përshpejtimet që do të bëhen gjatë likuidimit.

“AKP së shpejti, me datën 10 do të bëjë edhe hapjen e ofertave për angazhimin e autoriteti të likuidimit”, ka thënë ai, duke shtuar se afatet ligjore në të kaluarën kanë qenë të tejzgjatura, kurse tani maksimumi i tërë shqyrtimit të këtyre kërkesave me ndryshimet ligjore është 18 muaj.