Bizneset franceze tashmë e kanë më të lehtë të njihen me terrenin e Kosovës, e po ashtu edhe me bizneset kosovare, pasi që edhe zyrtarisht ka filluar funksionin Oda Ekonomike Frënge-Kosovare në Kosovë.

Kjo odë premtoi të kontribuojë edhe në përmirësimin e mjedisit të biznesit e po ashtu edhe në tërheqjen e investitorëve të huaj.

Në një konferencë për media, gjatë ditës së enjte, anëtarët e saj mbajtën edhe mbledhjen e parë, ku propozuan buxhetin, anëtarësimet dhe vizitën e parë të kryetarit të Konfederatës së Ndërmarrjeve të Vogla dhe të Mesme të regjionit Rhon e Alpes në Kosovë me 5 deri 8 mars.

Gjatë këtij takimi është arritur edhe një marrëveshje memorandumi, mes Odës Ekonomike Frënge-Kosovare dhe Odës Ekonomike të Kosovës, ku me këtë marrëveshje pritet të forcohet bashkëpunimi ndërmjet kompanive nga Franca dhe këto nga Kosova.

Jean François Fitu, ambasador i Francës në Kosovë, ka thënë se është i nevojshëm angazhimi në përmirësimin e mjedisit të biznesit dhe tërheqjen e investimeve të huaja në Kosovë.

“Memorandumi i bashkëpunimit ndërmjet dy odave ekonomike paraqet një mundësi reale dhe konkrete për bizneset në Kosovë që ta zhvillojnë vetveten”, ka thënë ai. Afrim Ethemi, kryetar i Odës Ekonomike Frënge-Kosovare, ka premtuar se do të ndikojnë në zhvillimin më të fuqishëm të ekonomisë së Kosovës.

“Prania e kompanive apo e bizneseve franceze në vend, është mjaft e pranishme, por ne do të kontribuojmë me praninë tonë që kompanitë franceze të jenë edhe më të pranishme me investimet e tyre në Kosovë”, ka shtuar ai.

Safet Gërxhaliu, kryetar i Odës Ekonomike të Kosovës, ka shtuar se e tëra kjo është një dëshmi që Kosova është një mjedis i rëndësishëm për zhvillimin ekonomik. Ai ka thënë se në këtë aspekt do të ndikojë edhe Franca, e cila dihet se ka dhënë kontribut të çmueshëm si gjatë luftës edhe pas saj e deri tash.