Për pesë milionë euro ka rënë importi i mallrave nga Serbia në muajin janar të këtij viti, krahasuar me muajin e njëjtë të vitit të kaluar ndërkohë që eksporti është rritur për mbi 200 mijë euro drejt Serbisë.

Ekspertët ekonomikë e shohin si rezultat të vetëdijesimit të konsumatorëve dhe hapave të ndërmarrë nga lëvizja Vetëvendosje. Zyrtarë të lëvizjes Vetëvendosje e konsiderojnë si sukses të tyrin, këtë rënie të importit nga shteti serb.

Adriatik Stavileci, zëdhënës i Doganave të Kosovës, ka thënë se në janar të këtij viti Kosova ka eksportuar drejt Serbisë 274 mijë e 604 euro, ndërsa gjatë janarit të 2011-ës, kishte eksportuar vetëm 41 mijë e 128 euro.

Kusari-Lila: Fituam pas reciprocitetit

Ministrja e Tregtisë dhe Industrisë ka thënë se rënia e importit nga Serbia është shumë e rëndësishme për sektorin e prodhimit. Ajo ka shtuar se nëse shikohet periudha para 20 korrikut të vitit 2011, Kosova ka një rritje prej 70 për qind të eksportit për në Serbi.

Ajo shprehej se ka një rënie të importit nga Serbia dhe se Kosova nuk ka humbur në raport me Serbinë.

“Po e them se të pretendohet se është humbur me atë çfarë është aplikuar më herët në raport me Serbinë është gabim i madh. Ne kemi fituar, ne kemi mundësuar lëvizjen e lirë të mallrave kosovare në të gjitha vendet e rajonit dhe në Bashkimin Evropian”, ka theksuar Kusari-Lila, në mediume tjera.

Vetëvendosje: Sukses i yni

Dardan Sejdiu, anëtar i kryesisë së Lëvizjes Vetëvendosje, ka thënë se me ngritjen e debatit dhe vendimit për reciprocitetin, dhe me fushatat tjera të kësaj lëvizjeje, ka luajtur rol në ngritjen e vetëdijes qytetare rreth mallrave serbe dhe nevojës për të konsumuar produkte vendore.

Ai ka shtuar se kjo lëvizje e ka bërë të qartë edhe në diskursin dhe programin e saj ekonomik që e vetmja mënyrë për t’u zhvilluar dhe për t’u forcuar Republika e Kosovës është duke promovuar reciprocitet në çdo aspekt.

“Ne gjithsesi konsiderojmë që këto aktivitete kanë pasur efekt në këto lëvizje, mirëpo reciprociteti i plotë është i domosdoshëm”, ka thënë ai, duke shtuar se Republika e Kosovës duhet të ketë dhe të zbatojë masa të reciprocitetit të plotë ekonomik, tregtar dhe politik me Serbinë.

Vetëdijesim i konsumatorëve

Lumir Abdixhiku, drejtor në institutin “Riinvest”, ka thënë për “Zërin” se kjo rënie e importit nga Serbia mund të ketë ndikim nga vetëdijesimi i konsumatorëve për të mos konsumuar produkte serbe.

“Kjo është një shenjë e mirë. Të bjerë importi nga Serbia nënkupton shumë, sepse Serbia nuk e njeh Kosovën e gjithnjë dëmton në çdo aspekt”, ka thënë ai.

Ai ka thënë se Vetëvendosje nuk ka mundur të kontribuojë në këtë aspekt, ngase aksionet e tyre kanë qenë simbolike. Mirëpo, sipas tij, Qeveria e vendit në asnjë mënyrë nuk ka rezultate në këtë rënie të importit.

“Nuk ka asnjë rezultat të Qeverisë këtu. Qeveria nuk është duke bërë asgjë në këtë drejtim, ngase nuk ka reciprocitet”, ka theksuar ai.

Edhe Musa Limani, ekspert ekonomik, ka thënë se Qeveria nuk ka gisht në këtë rënie.

Ai ka shtuar se këtu ka mundësi të kenë ndikuar hapat që ka marrë Vetëvendosje, ku prodhuesit vendorë ta kenë shfrytëzuar këtë periudhë për të eksportuar drejt Serbisë, derisa ata të kenë ngurruar në këtë drejtim.