Kosovën s’e ka prekur kriza financiare. Deri më tash është gjendja e mirë. Kështu ka deklaruara ministri i Financave (MF), Bedri Hamza, të premten gjatë një debati me temën “Kosova në krizë, apo afër krizës”, i organizuar nga Qendra për Hulumtime Strategjike dhe Sociale “STRAS”.

Në këtë tryezë ku u debatua për rrjedhat ekonomike karshi krizës globale, ministri Hamza tha: “Kosova nuk është në krizë, nuk është afër krizës, ka përparime, ka trend pozitiv, por sigurisht se ka segmente ku ne duhet të koncentrohemi dhe të punojmë shumë më shumë për ndërrimin e gjendjes aktuale në të cilën ndodhemi”.

Ministria e Financave ka paraparë që për këtë vit të ketë rritje ekonomike për 5,3 për qind. Sipas ministrit Hamza, vitin e kaluar rritja ekonomike ka qenë 5,4 për qind.

Nga ana tjetër kjo rritje e ekonomisë nuk është vlerësuar pozitive nga disa ekspertë të ekonomisë, sipas të cilëve, shumë prej investimeve janë kapitale të bëra nga Qeveria e Kosovës.

Edhe vendet e hapura të punës janë të përkohshme derisa të përfundojnë projektet. Sipas ekspertëve ekonomikë, kanë munguar investimet kapitale të prodhimtarisë, që do të hapnin vende pune të qëndrueshme.

Ata kanë kërkuan që fondet që janë investuar në tregjet ndërkombëtare, siç është fondi i privatizimit dhe paratë e Trustit, të kthehen në Kosovë, që të mos preken nga problemet financiare në botë.

Kryetari i Odës Ekonomike, Safet Gërxhaliu, ndryshe nga ministri Hamza, tha se Kosova është e ndikuar nga kriza botërore.“Është më se e vërtetë, evidente dhe të gjithë e dimë se Kosova ka hyrë në krizë. Dhe në këtë drejtim është e tepërt të debatohet se Kosova nuk ka krizë dhe nuk është e prekur nga kriza”, tha Gërxhaliu.

Ndërkaq, drejtori i Qendrës për Hulumtime Strategjike “STRAS”, Ibrahim Rexhepi, ka thënë se investimet e jashtme duhet të orientohen drejt vendeve me rritje të madhe ekonomike.