Reduktime të ashpra energjetike do të pasojnë ditët në vijim për shkak të mbingarkesës, për shkak se Korporata Energjetike e Kosovës (KEK), është e paaftë të prodhojë energji sa është rritur kërkesa.

Zyrtarët e KEK-ut kanë kërkuar nga konsumatorët që të kursejn sa më shumë, në mënyrë që të lejohet furnizimi i rregullt dhe pa reduktime. Ndërkohë që KEK-u një pjesë të fajit ia hedh edhe ngrohtores “Termokos”, që nuk po arrin të furnizojë me ngrohje konsumatorët e vet, duke bërë që të ketë mbingarkesë të madhe të energjisë.

Drejtuesi i KEK-ut Arben Gjukaj, ka thënë se blloqet funksionale mund të prodhojnë 900

MW, ndërsa ngarkesa në kohë piku këto ditë shkon deri në 1300 MW.

Ai ka thënë se kjo rezulton me nevojë të importit rreth 400 MW, për kushtet optimale të punës së blloqeve. “Gjithashtu, vështirësitë e “Termokosit” që t’iu ofrojë ngrohje konsumatorëve në Prishtinë gjatë tërë ditës kanë rezultuar në një ngarkesë në sistemin energjetik prej 80 MW. Si rrjedhojë e kësaj, ngarkesa në Prishtinë është konstant rreth 250 MW”, ka thënë Gjukaj.

Ai ka shtuar se gjendje e njëjtë mbizotëron edhe në rajon, ku linjat transmetime rajonale janë në limitin e tyre, pasi kërkesa është e jashtëzakonshme dhe se sipas tij, është vështirësuar situata edhe për import.

“KEK po importon në maksimum duke siguruar edhe import shtesë, por si pasojë e gjendjes rajonale, niveli i importit të nevojshëm në këtë gjendje të jashtëzakonshme është i pamundur të sigurohet”, ka thënë Gjukaj.

Në këtë takim është thënë se kushtet ekstreme atmosferike, kane vështirësuar prodhimin e energjisë elektrike, pasi që sipas tyre, acari ka penguar edhe stabilimentet në termocentrale, të cilat kohë pas kohe kanë dështuar të funksionojnë.

Sipas tyre, problemet rezultojnë te hinkat, rrëshqitja e shiritave transportues, thyerja e shiriti transportues të qymyrit që furnizon njësinë A4, ndërsa ekskavatorët e djerrinës nuk kanë mundur të punojnë prej mbrëmjes të së enjtes si pasojë e ngricave.

“Për shkak të gjendjes së vështirësuar, që nga e enjtja, përkatësisht me 2.02.2012 KEK-u ka shpallur gjendje të jashtëzakonshme dhe të gjithë punëtorët e korporatës në të gjitha divizionet janë në gatishmëri gjatë 24 orëve dhe po japin maksimumin e tyre, aty ku është e nevojshme që gjendja të jetë sa më stabile”, është thënë në këtë konferencë.

Për të lehtësuar gjendjen, zyrtarë të kësaj korporate kanë kërkuar nga konsumatorët e mëdhenj të zvogëlojnë ngarkesën. “Duke u nisur nga të gjitha këto rrethana të krijuara për shkaqe natyrore, apeloj te të gjithë konsumatorët që të bëjnë kursim maksimal të energjisë elektrike”, është thënë aty.

Rekomandimet drejt konsumatorëve kanë qenë që të përmbahen nga shfrytëzimi i energjisë për ngrohje sa më shumë që është e mundur, të shkyçen bojlerët gjatë orëve të pikut në mëngjes dhe mbrëmje, dhe të të shfrytëzohen mundësisht pajisjet me dru ose me gaz për zierje të ushqimit.