Hiç më pak se 10 milionë euro janë paraparë të shpenzohen për import emergjent të energjisë elektrike nga muaji shkurt e deri në fund të këtij viti.

Po ashtu, para pak ditësh, përmes një tenderi tjetër publik, Korporata Energjetike e Kosovës (KEK) ka paraparë të shpenzojë hiç më pak se 44 milionë euro për furnizim me energji elektriket të moduluar dhe të pikut për periudhën prill 2012 mars 2013.

Përmes këtyre dy tenderëve, ku kompanitë fituese janë të njëjta, KEK-u ka paraparë që për import të energjisë elektrike deri në fund të vitit, respektivisht në fund të muajit prill të vitit 2013 të shpenzojë rreth 55 milionë euro për import të energjisë në kohë piku, por edhe import të energjisë në raste emergjente.

Zëdhënësi i KEK-ut, Viktor Buzhala, thotë se në tenderin "Furnizim me energji emergjente për periudhën shkurt - dhjetor 2012", KEK-u ka përzgjedhur katër kompani.

Sipas tij, fituese në këtë tender janë: “GEN, nga Sllovenia, “EGL” nga Zvicra, “RUDNAP” nga Serbia, dhe “EFT” nga Zvicra.

Zëdhënësi Buzhala thotë se vlera e zotuar e tenderit është 10 milionë euro, por sipas tij, kjo energji është e bazuar në blerjen në bazë të koeficienteve dhe varet prej kërkesës për energji elektrike dhe çmimeve në bursë pas përmbylljes në baza mujore.

”Nuk ka çmim, sepse ofertat fituese janë të bazuara në koeficiente, e kanë fituar ato me koeficientin më të ulët. Koeficientet llogariten me çmimin e bursës pas përmbylljes së çdo muaji. KEK ka vepruar në këtë mënyrë, sepse këto lloje të energjisë nuk mund te blihen ndryshe, pos me koeficient që lidhen direkt me çmimet e bursave ndërkombëtare, në këtë rast evropiane nga Gjermania”, tha ai.

Në anën tjetër, njohës së mirë të fushës së energjisë në vend thonë se politikat e gabuara të Qeverisë po i paguajnë qytetarët e Kosovës me import të shtrenjtë të energjisë elektrike.

Ethem Çeku, ish-ministër i Energjisë nga radhët e Aleancës për Ardhmërinë e Kosovës thotë se Qeveria edhe më tej po e zvarrit projektin për ndërtimin e termocentralit të ri “Kosova e Re”, i cili, sipas tij, do të stoponte importin e energjisë.

Çeku tha se së paku Kosova deri në vitin 2018 do të vazhdojë të importojë energji, por edhe të përballet me probleme të mëdha energjetike.

“Zhbllokimi i projektit për ndërtimin e termocentralit të ri është zgjidhja e vetme për Kosovën. Prodhimi i energjisë nga linjiti është më i lirë dhe më i favorshëm për Kosovën”, tha ai.