Federata Sindikale e Pavarur e PTK-së, kundërshton zvogëlimin e pagave në PTK duke konsideruar se është bërë në kundërshtim me Legjislacionin e Kosovës në fuqi dhe aktet e brendshme të PTK-së.

“Këto veprime janë bërë në kundërshtim me Ligjin e Punës për dialogun social dhe marrëveshjen e nënshkruar mes PTK-së dhe Sindikatës nr:01/663-05 të dt.15/02/2005, ku në mënyrë të detajuar janë përcaktuar nivelet e gradave-pagave dhe të gjitha benefiteve tjera”, thuhet në reagimin e kësaj sindikate të PTK-së.

Ata thonë se nuk kanë qenë pjesë e këtij procesi aktual, i cili po tregon se nuk ka të bëjë me nivelimin e gradave por me: degradim, deformim, demotivim dhe deharmonizim te punëtorët e PTK-së.

Kjo sindikatë kërkonë nga Bordi i PTK-së, që urgjentisht ta bëjë rishikimin e planit të biznesit për vitin 2012, me qëllim të ruajtjes së afarizmit të qëndrueshëm financiar të PTK-së; për të gjitha veprimet të cilat i merr Bordi dhe Menaxhmenti i PTK-së, me qëllim të tejkalimit të kësaj situate, FSP-PTK, ofron bashkëpunim dhe ndihmë.

“Nëse nuk përfillen kërkesat e lartcekura, FSP-PTK, do të marrë veprime të tjera konform legjislacionit në fuqi, statutit të FSP-PTK dhe akteve tjera të brendshme të PTK-së”, thuhet në reagim të nënshkruar nga kryetari i Sindikatës, Milzaim Alshiqi.

Menaxhmenti i Postë-Telekomit të Kosovës (PTK), të premten e kaluar, ishte kujdesur që pagat për 20 për qind t’ia zvogëlojë vetëm rreth gjysmës së punëtorëve të kompanisë, ndërsa për gjysmën tjetër, ku përfshiheshin njerëzit me ndikim te partitë e koalicionit qeverisës dhe për menaxhmentin, nuk parashihej kurrfarë zvogëlimi, madje planifikohej ngritje e pagave.

Sipas vendimit të javës së kaluar, pagat do t’u zvogëloheshin 1400 punëtorëve, 1600 të tjerëve do t’u mbeteshin të njëjta, ndërsa rreth 300 punëtorëve do t’u ngriheshin.

Burimet e gazetës “Zëri” thonë se në listën e punëtorëve për moszvogëlim të pagave, apo për ngritje të tyre, ishin përfshirë punëtorë të PTK-së, të cilët janë anëtarë të partisë më të madhe në vend (Partisë Demokratike të Kosovës), të kryemistrit Hashim Thaçi.