Zyrtarët e Doganave të Kosovës kanë bërë me dije së rënia e impotit nga Serbia është bërë për shkak të motii të lig, derisa ditë më parë, për këtë rënie, ministrja e Tregtisë dhe Industrisë, Mimoza Kusari-Lila kishte thënë se është sukses i saj, të njëjtën gjë e kishin thënë edhe zyrtarë të Lëvizjes Vetëvendosje.

Sipas zyrtarëve të doganave, moti i lig dhe bora që ka rënë në vend, ka ndikuar në rënie të importit dhe eksportit të mallrave krahasuar me periudhën e njëjtë të këtij viti me atë të vitit paraprak.

Adriatik Stavileci, zëdhënës i Doganave, ka thënë për “Zërin” se janari dhe gjysma e muajit shkurt të këtij viti ka shënuar rënie të importit për mbi 32 milionë euro, krahasuar me periudhën e njëjtë të vitit të kaluar, derisa sipas tij, edhe për eksportin vërehet një rënie prej mbi 5 milionë euro gjatë kësaj periudhe.

“Kushtet atmosferike kanë ndikuar në zvogëlimin e importit nëpër të gjitha pikat kufitare”, ka thënë Stavileci.

Ai ka thënë se për shkak të borës së madhe që ka rënë është bllokuar edhe kufiri me Malin e Zi dhe dy pika tjera kufitare ajo e Globoçicës dhe Mutivodës.

Stavileci ka thënë se vlera doganore për muajt janar-13 shkurt të vitit 2012 e importit është 163 milionë e 541 mijë e 190 euro, derisa për periudhën janar-13 shkurt të vitit të kaluar, Kosova kishte importuar 195 milionë e 806 mijë e 479 euro.

Kurse, sipas tij, Kosova ka eksportuar për muajt janar-gjysma e muajit shkurt të këtij viti 8 milionë e 126 mijë e 965 euro, ndërsa për të njëjtën periudhë të vitit të kaluar kishte eksport 13 milionë e 514 mijë e 204 euro.

Sipas tij, kjo vërehet edhe nga sasia e ulët e importeve gjatë këtij muaji, krahasuar me muajt e njëjtë të vitit paraprak.

“Për momentin pika kufitare komerciale është e bllokuar vetëm me Malin e Zi (Kulla), kurse kalimet jo-komerciale janë të bllokuara Globoçica dhe Mutivoda”, ka thënë ai.

Ministrja e Tregtisë dhe Industrisë kishte thënë ditë më parë se rënia e importit nga Serbia, është shumë e rëndësishme për sektorin e prodhimit. Ajo pati deklaruar se nëse shikohet periudha para 20 korrikut të vitit 2011, Kosova ka një rritje prej 70 për qind të eksportit për në Serbi.

Dardan Sejdiu, anëtar i kryesisë së Lëvizjes Vetëvendosje, pak ditë më parë ka thënë për “Zërin” se me ngritjen e debatit dhe vendimit për reciprocitetin, dhe me fushatat tjera të kësaj lëvizjeje, ka luajtur rol në ngritjen e vetëdijes qytetare rreth mallrave serbe dhe nevojës për të konsumuar produkte vendore.

Ai pati thënë se kjo lëvizje e ka bërë të qartë edhe në diskursin dhe programin e saj ekonomik që e vetmja mënyrë për t’u zhvilluar dhe për t’u forcuar Republika e Kosovës është duke promovuar reciprocitet në çdo aspekt.

“Ne gjithsesi konsiderojmë që këto aktivitete kanë pasur efekt në këto lëvizje, mirëpo reciprociteti i plotë është i domosdoshëm”, kishte thënë ai.