Katër vjet pas shpalljes së pavarësisë së Kosovës, kosovarët nuk krenohen me shtetin e tyre, duke parë secilën ditë pushtetatët duke e rritur luksin, derisa mundësia për t’u punësuar vetëm sa vjen e zvogëlohet.

Kritikët e pushtetit thonë se Qeveria ka dështuar në luftimin e korrupsionit, dukuri kjo e cila është vlerësuar që nga partitë opozitare, shoqëria civile e po ashtu edhe Agjencia Kundërkorrupsion, të cilët kanë thënë se korrupsioni në vend vetëm sa është thelluar.

Avdullah Hoti, drejtuesi i Grupit të ekspertëve të ekonomisë nga radhët e LDK-së, ka thënë se çdo raport ndërkombëtar ka përfshirë korrupsionin, e që kanë treguar vetëm se është thelluar korrupsioni në vend.

Ai ka thënë se për shkak të korrupsionit të madh, është dashur të ndërhyjë edhe presidentja e vendit. “Presidentja e vendit është detyruar që të krijojë një këshill për luftim të korrupsionit. Kjo nënkupton që kjo qeveri ka dështuar në luftimin e korrupsionit”, ka thënë ai.

Sipas tij, korrupsioni në vend nuk ka shënuar as më të voglin progres, ngase siç ka thënë ai, po të kishte progres, nuk do të kishte nevojë të luftohej korrupsioni nga presidentja.

Glauk Konjufca, nga radhët e lëvizjes Vetëvendosje, ka thënë se lufta ndaj korrupsionit në vend nga ana e qeverisë ka mbetur në nivel të fjalëve e fushatave, që nuk kanë pasur as efektin më të vogël.

Sipas tij, edhe vetë mënyra se si është qasur kjo qeveri në luftimin e korrupsionit tregon joseriozitet për ta luftuar atë. “Krijimi i secilit institucion agjencione të vetat për të luftuar korrupsionin tregon qasjen e tyre dhe tani këto janë rezultatet, që tregojnë thellimin e kësaj dukurie”, ka thënë Konjufca.

Konjufca ka thënë se edhe këshilli i fundit i krijuar nga presidentja e vendit do të ketë efektin zero, duke u bazuar në agjencitë e krijuara më herët. “Korrupsioni luftohet me drejtësi, e jo me fjalë”, ka theksuar ai.

Ndërsa, nga radhët e shoqërisë civile është vlerësuar se korrupsioni në vend vetëm sa po thellohet, duke e quajtur katërvjetorin e pavarësisë si festë që i lidh politikanët për korrupsion.

Avni Zogiani, drejtues i organizatës “Çohu”, ka thënë se mosrealizimi i pavarësisë edhe 4 vite pas shpalljes, ka lidhje direkt me korrupsionin. Ai ka thënë se Bashkimi Evropian nuk po gjen konsensus për ta njohur pavarësinë e Kosovës, nga një presion i vazhdueshëm nga Serbia e Rusia, gjë që edhe po lyp “status kohë”.

“Kjo status kohë po kërkohet për shkak të korruptimit të liderëve vendorë, e që po përfitojnë edhe ndërkombëtarët”, ka thënë Zogiani. Ai ka shtuar se që nga paslufta, nuk ka fare progres në parandalimin e korrupsionit.

“Jo që nuk ka progres, por edhe qeveria i ka ‘çuar duart’ që të bindë popullin e vendit se në vend nuk ka korrupsion”, ka thënë Zogiani.

Për Zogianin, po të ishte vetëm partia në pushtet e korruptuar nuk do të paraqiste ndonjë problem të madh, por sipas tij, ai e sheh se të gjitha partitë në vend e kanë bazë korrupsionin.

Po ashtu zyrtarë të Lëvizjes FOL kanë thënë se korrupsioni dhe krimi i organizuar po dëmtojnë progresin ekonomik të Kosovës. Ata i kanë vënë një titull kësaj feste, “Politikanët rreth korrupsionit të përbashkuar”, ngase e shohin si liri vetëm për politikanët.

“Është një protestë qytetare karshi një sjellje të pacipë prej anës së elitës politike të vendit, e cila e ka zhytur shtetin në korrupsion” është thënë gjatë një aksioni që ka marrë kjo lëvizje gjatë ditës së premte.

Sipas tyre, korrupsioni është i shpërndarë në të gjitha institucionet e shtetit sepse ky është vullneti i elitës politike të Kosovës, të cilët buxhetin publik të vendit e kanë shndërruar në një burim të përhershëm të financimit të kënaqësive të tyre.

Preteni: Nuk do ta udhëheq më AKK-në, nëse nuk ka rezultate

Hasan Preteni, drejtor i Agjencisë Kundër Korrupsion, ka thënë se nuk ka rezultate në parandalim të korrupsionit në vend. Sipas tij, nëse shihet nga paslufta, e po ashtu katër vjet pas shpalljes së pavarësisë së vendit, ka një lëvizje të vogël në këtë drejtim, por jo ashtu siç ishte pritur.

Ai ka thënë se pret që vitin tjetër të ketë rezultate konkrete lidhur me rastet të cilat hetohen për korrupsion. “Jam i bindur që nuk do të udhëhiqja një institucion kaq të rëndësishëm për luftimin e korrupsionit nëse nuk do të shihja që vitin tjetër do të ketë progres në parandalimin e korrupsionit në vend” është shprehur Preteni.

Preteni ka pohuar se për të zgjidhur një problem duhet të debatohet, dhe se sipas tij, tani në vend ka debate të mjaftueshme për korrupsionin dhe se sheh zgjidhje në këtë drejtim. “Deri më tani ka fjalë, ka raste të korrupsionit, por mungojnë shifrat e dënimeve për këto vepra”, thotë ai.

Ai ka premtuar se pesëvjetori i pavarësisë së Kosovës do të flasë me shifra konkrete në parandalimin e korrupsionit.