Arsyetimi i Hoxhës

Në raportin e kreut të ART-së dërguar kreut të Kuvendit të Kosovës thuhet se garancia bankare Nr. 106199190107.07) është i lëshuar në 3 kopje origjinale më 15.01.2007 në Arezzo të Italisë nga institucioni financiar LA Stella finanziaria SpA në emër të përfitimit të obliguesit, Consortium Kosova Mobile(Capital Menagement Holding PLC dhe Kujtesa LLC) me adresë për këtë akt/garancion bankar në Adorno& Wyller Capital Management SPA Via Riccardo Lombardi 19/6, 20153 Milano(Itali, VAT 04774630968 për llogari(përfituesin) Autoritetin Rregullator të Telekomunikacionit(ART).

Kryetari i ri i ART-së, Ekrem Hoxha, deklarohet, sipas këtij raporti, se gjatë pranim- dorëzimit zyrtar të detyrës nga ish-kryetari i Bordit, Anton Berisha, proces i administruar më 6 tetor 2010 nuk ka pranuar ndonjë referencë apo udhëzim zyrtar/formal apo joformal lidhur me çështjen e garancisë bankare dhe se lidhur me temën e njëjtë nuk është diskutuar asnjëherë brenda institucionit të ART-së deri me rastin e parashtrimit të pyetjes parlamentare gjatë seancës së Kuvendit të mbajtur më 25 shkurt 2010.

Mirëpo, të kundërtën e thotë deputeti i pavarur në Kuvendin e Kosovës, Driton Tali. Sipas tij, në seancën e 17 shkurtit të vitit 2009 në Kuvendin e Kosovës e ka ngritur çështjen e operatorit të dytë të telefonisë mobile, por prej asaj kohe e deri më tash nuk ka marrë ndonjë përgjigje. Deputeti Tali thotë se Lulzim Kurtaj, i cli ka qenë përgjegjës për garancinë bankare të operatorit të dytë të telefonisë mobile është shpërblyer, duke u zgjedh anëtar i bordit të këtij institucioni. Ai thotë se prej vitit 2007 e deri më tash ART-ja nuk e ka deponuar garancinë bankare në thesarin e Kosovës “ART-ja nuk mund ta mban garancinë nëse e ka në sirtarë të saj, por duhet të çojë për ta ekzekutuar në buxhet”, tha ai.

Tali thotë se është e pakuptimtë pse ART nuk e ka dërguar deri më tani në thesarin e shtetit garancinë bankare prej 16.2 milionë euro dhe sipas pasojë e kësaj, ai thotë se nëse llogaritet kamata e këtyre mjeteve prej 4 %, atëherë për 3 vjet buxheti i vendit është dëmtuar për rreth 200 mijë euro.

Akuzat e Zogianit

Edhe Avni Zogiani nga Organizata për Dinjitet dhe Anti Korrupsion, “Çohu”, thotë se historia e garancisë bankare për tenderin e dytë të telefonisë mobile është histori e përzierjes së krimit të organizuar me politikën.

Sipas tij, ky problem është bllokuar edhe në Kuvendin e Kosovës “nga ish-kryeministrat dhe ministrat aktual të blerë nga korrupsioni dhe është mirë më në fund që EULEX-i po merret me çështjet qe ne jemi munduar me i ngrit tash e pesë vjet”.

“Është mirë më në fund që EULEX –i po merret me çështjet që ne jemi mundu me i ngrit tash e pesë vjet. Mirëpo, është shumë e rëndësishme që rastet si ky, që janë zemra e korrupsionit ne Kosovë, të hetohen deri ne fund. Njeriu kryesor si përgjegjës për këtë problem, Anton Berisha, është shpërblyer nga presidenti me pozicionin ambasador në Slloveni”,tha ai.

Ndërkaq, Myzejene Selmani, kryetare e komisionit parlamentar për Ekonomi, thotë se nga fillimi e deri më tash ka pasur shumë pa rregullsi dhe paqartësi rreth garancisë bankare që e ka ofruar kompania “Cosmosel”.

Në konluzionin e raportit të ART-së thuhet se Bordi i këtij institucioni konfirmon gatishmërinë e menjëhershme dhe përgjegjësinë zyrtare që në rast të gjykimit të përmbushjes së kushteve për ekzekutimin të përmbushë obligimin për të iniciuar procedurat e paraqitjes për ekzekutim të garancisë bankare para thesarit, Ministrisë së Financave apo Bankës Qendrore, të cilën gjë nuk e kanë bërë që disa vjet.

Lluka: Garancia ka qenë origjinale

Njëri nga partnerët e konzorciumit Cosmocell, Ekrem Lluka, i kontaktuar të hënën nga “Zëri” ka thënë se institucionet kompetente duhet t’i ndjekin procedurat e nevojshme për ekzekutimin e garancisë bankare. Ai ka mohuar që kjo garanci bankare të mos ketë qenë origjinal.