Prishtinë. Agjencia Kosovare e Privatizimit (AKP) pret që gjatë kësaj jave ta investojë jashtë vendit në periudha më afatgjate fondin e mirëbesimit, i cili është grumbulluar nga shitja e ndërmarrjeve shoqërore. Po ashtu, drejtuesit e Agjencisë shpresojnë se një pjesë e këtij fondi, i cili kap shumën e përgjithshme prej mbi 460 milionë eurosh, shumë shpejt do të kthehet dhe të investohet në Kosovë.

Zëdhënësi i AKP-së, Ylli Kaloshi, ka konfirmuar të dielën për “Zërin” se mjetet nga një pjesë e fondit të mirëbesimit pritet të deponohen gjatë kësaj jave jashtë vendit.

Sipas tij, norma e kamatës që AKP aktualisht fiton nga paratë në mirëbesimit të mbajtura në llogaritë rrjedhëse është 0.10 %. Mirëpo, sipas tij, me investimet e këtyre mjeteve në periudha më afatgjate, përkatësisht në 3 ose 6 muaj, për dallim nga vetëm disa ditë që i investon BQK edhe interesi do të rritet.

Ai thotë se ka pasur edhe diskutime lidhur me mundësinë që një pjesë e këtij fondi të kthehet dhe të investohet në Kosovë.

Megjithatë, AKP nuk mund që mjetet e Fondit të Mirëbesimit t’i investojë pa pëlqimin e Përfaqësuesit të Zyrës Civile Ndërkombëtare në Kosovë, Piter Feith.

Zëdhënësi i Feithit, Andy McGuffie, ka thënë për “Zërin” se sa i përket fondit të privatizimit, Përfaqësuesi Civil Ndërkombëtar ka deklaruar se Ligji dhe Propozimi Gjithëpërfshirës i Statusit (PGJS) përcakton rregulla të qarta mbi menaxhimin e këtyre burimeve, për të siguruar mbrojtjen e tyre.

Sipas tij, të gjitha fondet e tilla duhet të ruhen me mirëbesim për të mirën e pronarëve dhe kreditorëve përkatës dhe të mbahen nga Agjencia Kosovare për Privatizim (AKP). “Fondet tepricë të mbajtura me mirëbesim nga AKP-ja do të transferohen në buxhetin e Kosovës pas pëlqimit të të gjitha kërkesave që janë dorëzuar me kohë dhe që janë përcaktuar të jenë valide dhe pas skadimit të afatit për dorëzimin e kërkesave të tilla”, ka potencuar McGuffie.

Ai ka potencuar se Agjencia Kosovare e Privatizimit ka bordin e vet të drejtorëve që para së gjithash është përgjegjës për të marrë vendime strategjike, përfshirë investimin e fondeve.

Sa i përket mundësisë së investimit të këtyre mjeteve në Kosovë, McGuffie ka pohuar se gjithnjë kanë theksuar se Propozimi Gjithëpërfshirës i Statusit kërkon që fondet duhet të investohen në mënyrë të sigurt, në instrumentet e vlerësuara si koeficient i investimit nga agjenci ndërkombëtare të rejtingut.

“Letra të tilla me vlerë nuk ekzistojnë për momentin në Kosovë, së paku jo në një nivel adekuat dhe nuk i takon ICO-së që të spekulojë se a do të ndryshojë kjo në të ardhmen”, ka sqaruar ai.

Në anën tjetër, Myzejene Selmani, kryetare e Komisionit Parlamentar për Ekonomi, thotë se komisioni që ajo e drejton e mbështet kthimin e fondit të privatizimit në Kosovë, nëse ekzekutivi i vendit ka ndonjë projekt konkret se ku do të investohen ato.

Në të kundërtën, sipas saj, një iniciativë e tillë nuk do të ketë përkrahjen e Kuvendit.

“Ne nuk e mbështesim kthimin e fondit të privatizimit që të shpenzohet në dreka dhe darka zyrtare, mirëpo e mbështesim kthimin e tyre nëse ekziston ndonjë projekt konkret se ku do të investohen”, shprehet Selmani.

Ajo thotë se një pjesë e këtij fondi mund të investohet edhe në bankat komerciale në vend, duke ndikuar në këto të fundit që t’i zbresin normat e larta të interesit në kredi.