Në Shqipëri mund të jetë rritur numri i vizitorëve, emigrantë apo shtetas të huaj, por prurjet e valutës gjatë këtij sezoni veror në tregun e brendshëm kanë qenë të pakta.

Sipas ekspertëve, krahasuar me një vit më parë, rënia është e dukshme dhe shkon në më shumë se 15% më pak valutë e hedhur në treg. Ekspertët thonë se edhe për festat e fundvitit prurjet kanë qenë nën parashikimet, një sinjal ky paralajmërues për pritshmërie e sezonit të verës.

Më pak hyrje në tregun e brendshëm valutor ka pasur për monedhën evropiane dhe kanë qenë emigrantet shqiptarë në Greqi ata të cilët kanë sjellë më pak valutë, fakt ky, që sipas ekspertëve ka ardhur si pasojë e krizës në shtetin fqinj.

Ndërsa kanë qenë më normale shkëmbimet valutore që janë kryer nga emigrantët tanë në Itali. Një burim tjetër që ka furnizuar disi tregun me euro për ketë sezon kanë qenë edhe shtetasit kosovarë, të cilët kanë frekuentuar turizmin shqiptar.

Një tjetër fenomen që është vënë re këto dite sipas ekspertëve është rritja e kërkesës për të blerë valute po nga emigrantët, të cilët kanë tërhequr pjesë të kursimeve të tyre depozituar në Shqipëri, për t’i marrë me vete para se të largoheshin drejt vendeve ku punojnë. Ky fakt ka bërë që këto dy ditë euro të fitojë pikë.

Në tregun e lirë valutor 1 euro është shkëmbyer mesatarisht për 136,48 lekë. Ndërkaq sipas ekspertëve vazhdon të ngelen po në të njëjtat nivele prurjet e monedhës amerikane në tregun e brendshëm, si edhe ato të monedhës britanike.