Tiranë. Borxhi i qeverisë shqiptare parashikohet të rritet për tre vitet e ardhshme, me rreth 128 miliardë lekë, ose të paktën mbi 1 miliard dollarë. Rritja e totalit të borxhit publik me rreth 14 për qind është planifikuar në programin buxhetor afatmesëm 2011-2013 dhe parashikohet të shërbejë për nevoja të qeverisë, kryesisht për investimet.

Por, ekspertë të Ministrisë së Financave deklarojnë se rritja e borxhit me këto përmasa nuk tregon direkt huan e re që do të merret, por nivelin e disbursimit të fondeve nga marrëveshjet e lidhura më parë dhe nga maturimi i afateve për fillimin e shlyerjes së kredive.

Në total, borxhi publik parashikohet të shkojë deri në vitin 2013, në masën e 858 miliardë e 552 milionë lekëve, kurse në vitin e ardhshëm, në rreth 777 miliardë e 334 milionë lekë, ose gati 46 miliardë më shumë se viti aktual, 2010-a.

Pavarësisht kësaj mase që duket e lartë, deficiti buxhetor parashikohet në rënie, ku nga 3.1 për qind që është aktualisht, të arrijë në 2.4 pas tre vjetëve. Kjo masë drastike e uljes së deficitit buxhetor (në 2009-n ishte 7.8 për qind), i dedikohet reduktimit të shpenzimeve dhe pakësimit të investime, gati dyfish në raport me Prodhimin e Brendshëm Bruto (PBB).

Megjithatë, qeveria nuk do të heqë dorë nga sjelljet e mëparshme, që në periudha fushatash, shpenzimet rriten përtej mundësive. Nëse për dy vitet e ardhshme, parashikohet që borxhi të rritet me të paktën 32 miliardë lekë, në vitin 2013, ku do të zhvillohen zgjedhjet e përgjithshme parlamentare, huamarrja parashikohet të rritet me të paktën 40 miliardë lekë.

Në raport me PBB-në, borxhi publik do të pësojë ulje në nivelin e 54 përqindëshit, nga rreth 60 për qind që është sot. Megjithatë, ministria paralajmëron se skenarët mund të ndryshojnë në rast të përkeqësimit të ekonomisë dhe uljes së ritmit rritës.