Këshilli i Rregullimit të Territorit në Qarkun e Kukësit, i ka dhënë dritën jeshile projektit për ndërtimin e një hidrocentrali të ri në zonën e Lumës.

“Hidrocentrali do të prodhojë 38 milionë euro energji dhe për ndërtimin e tij do të investohen 12.8 milionë euro, ndërsa pritet të mobilizohet një fuqi punëtore nga 520-580 vete”, thotë drejtori i kompanisë ndërtuese, Gentian Sulo.

Projekti është mirëpritur nga administrata vendore. Kryetari i qarkut të Kukësit, Shefqet Bruka, theksoi se projekti do të ketë ndikime të rëndësishme pozitive në ekonominë e zonës.

Ujërat e Kukësit ofrojnë mundësi për ndërtimin e mjaft hidrocentraleve, por të gjitha kompanitë që kanë plane investimi në këtë zonë dhe administrata lokale po përballen së fundmi me shqetësimet që ka krijuar një iniciativë e qeverisë së Kosovës, për ndërtimin e HEC-it të Zhurit, që devijon rrjedhën natyrale të disa lumenjve të Kukësit

“Mendoj se Kosova duhet ta vendosë vetë nëse do të bëjë ose jo hidrocentralin, por këtë duhet ta bëjë në ujërat e saj”, tha Bruka.

Ekspertë shqiptarë prej kohësh kanë kundërshtuar ndërtimin e hidrocentralit të zhurit në Kosovë pasi dëmton ekosistemin, ekonominë e zonës. Por qeveria shqiptare ende nuk ka dhënë një vendim përfundimtar për këtë çështje. (TCH)