Tiranë. Në zonat bregdetare të Shqipërisë nuk do të lejohen ndërtimet e larta mbi tre kate. Vendimi është marrë sot gjatë mbledhjes së Këshillit të Rregullimit të Territorit të Republikës së Shqipërisë.

Për këtë arsye, KRRTRSH-ja ka marrë në shqyrtim dhe ka miratuar studimin urabanistik pjesor për ndërtimin e resortit "New Born", me sipërfaqe 1 milion e 8 mijë e 380 metër katror, në fshatin Hamallaj, Bashkia Sukth, në Qarkun e Durrësit.

"Ne kemi rreth 92 -94 për qind të brigjeve për t'i zhvilluar dhe duhet të synojmë të mbetemi tek ndërtesa me 2 ose 3 kate. Duhet të bëhen projekte zhvillimore për të përcaktuar distancën jashtë së cilës mund të tolerohen ndërtime më të larta, dhe kjo mund të parashikohet në rastet kur sipërfaqja e ndërtimit shtrihet në largësinë 1 mijë metra nga bregu i detit dhe ndodhet në terren të rrafshët", tha Kryeministri gjatë fjalës së tij.

Për sa i përket gjelbërimit të zonës ku parashikohet të ndërtohet resorti "New Born", Berisha tha se brezi i parë duhet të ketë pisha, por gjithë hapësirat e tjera mundësisht duhet të jenë ullinj.

"Duhet të mbillet numri më i madh i mundshëm i ullinjve pa cenuar tërësinë e ndërtimit, por duhet të ecet drejt rritjes së rrënjëve të ullirit me të gjitha mënyrat", tha Berisha. Gjithashtu është miratuar edhe studimi urbanistik pjesor për leje sheshi dhe ndërtimi për objektin "Qendra e zhvillimit të turizmit, Valbonë".

Projekti shtrihet në një sipërfaqe rreth 4200 metra katror në mes të fshatrave Valbonë dhe Rragam dhe përbri rrugës që është në ndërtim e sipër. Kjo qendër është e destinuar që të ketë dy objekte ndërtimi me destinacion të pritjes së turistëve. Qendra do të ketë ambiente për sallë interneti, zyrë informacioni për turistët, muze, terrene sportive, etj. (Start)