Ndonëse muaj më parë Qeverisë së Kosovës me Ligjin e ri të Prokurimit i ndalohet publikimi i konkurseve dhe njoftimeve tjera nëpër gazeta, premtimi i kryeministrit Thaçi për heqje të TVSH-së, që mediet ngarkohen me pagesë prej 16 për qind ende nuk po realizohet.

Zyrtarë të Qeverisë, më parë kanë thënë se ky premtim do të realizohet shumë shpejt, derisa drejtuesit e medieve e konsiderojnë një lehtësim të madh heqjen e TVSH-së, por nuk besojnë në realizmin e këtij premtimi.

Ismail Musliu, drejtori i financave në gazetën “Zëri”, ka thënë se nuk është premtimi i parë për heqjen e TVSH-së, që nuk është realizuar.

Ai ka thënë se premtimi është bërë por ende nuk është realizuar për heqje të TVSH-së për mediet, dhe se tani ka humbur edhe shpresa se një gjë e tillë do të ndodhë.

“Mosheqja e TVSH-së ndikon direkt në shumën e TVSH-së, që i bie të jetë 16 për qind në zvogëlimin e të hyrave për mediet”, ka thënë Musliu.

Ai ka shtuar se nëse bëhet heqja vetëm për medie kurse nuk hiqet edhe për letrën, kjo do të thotë vetëm një lojë politike.

Ai ka kërkuar që heqja e TVSH-së për mediet të mos jetë vetëm për ndryshim të çmimit.

“Nuk ka rezultat nëse bëhet heqja e TVSH-së vetëm për ndryshim të çmimit. Ne kërkojmë që të eliminohet në tërësi TVSH-ja për mediet”, është shprehur Musliu.

Ymer Mehmeti, drejtor i Financave në gazetën “Koha Ditore”, ka thënë se për sa i përket ndikimit të pagesës së TVSH-së, kjo është vërejtur prej fillimit të aplikimit të TVSH-së, pasi që vetë çmimi i gazetës nuk ka pasur mundësi të ngrihet për 15 për qind.

Ai ka thënë se vlera e TVSH-së është dashur të nxirret prej çmimit, dhe kjo drejtpërdrejt ka ndikuar në uljen e të hyrave për përqindjen e TVSH-së dhe se sipas tij, e njëjta gjë ka ndodhur edhe me rritjen e TVSH-së nga 15 në 16 për qind.

“Obligimi për pagesë të TVSH-së, është i njëjtë sikurse për çdo biznes tjetër, kështu që për çdo të hyrë duhet llogaritur TVSH-në”, ka shtuar ai.

Sipas tij, premtimi për heqjen e TVSH-së, i cili nuk është zbatuar, e që ai shpreh dyshim se ky premtim nuk do të zbatohet ashtu siç nuk është zbatuar edhe në disa produkte tjera, ende nuk do të ndodhë.

“Këtu e kam fjalën se nëse hiqet TVSH-ja për medie, ndërsa nuk hiqet TVSH-ja edhe në materialin e shtypit, atëherë kjo do të ishte vetëm një marketing politik siç ka ndodhur me heqjen e TVSH-së për bukë, ndërsa në miell dhe grurë TVSH-ja nuk është hequr”, ka theksuar ai, duke shtuar se e njëjta mund të ndodhë edhe në këtë rast, që praktikisht TVSH-ja të hiqet vetëm në ndryshimin e çmimit që është një diferencë simbolike.

Ai ka thënë se në bazë të këtyre dyshimeve, Qeveria e vendit është duke kërkuar metoda të ngjashme për mosheqjen e TVSH-së në realitet, por vetëm heqjen për marketing politik dhe se për këtë arsye nuk ka mundur ta mbajë premtimin deri në gjetjen e një zgjidhjeje të ngjashme.

Kurse, këshilltari i ministrit të Financave, Menderes Ibra, kishte deklaruar për medie tjera se heqja e TVSH-së për medie do të ndodhë shumë shpejt.

Sipas deklarimeve të tij, këto vonesa kanë ndodhur për arsye procedurale.

Ai kishte thënë se janë duke u diskutuar edhe opsionet se si do të jetë heqja e TVSH-së, megjithatë pavarësisht opsioneve ai kishte deklaruar se mediet do të jenë përfituese.