Banka Botërore nuk ka ende një shifër lidhur me ndihmën që do t’i japë Shqipërisë për zbutjen e efekteve të krizës.

Përfaqësuesja e Bankës Botërore për Shqipërinë, Kseniya Lvovski tha sot se Shqipëria është vendi me borxhin më të lartë në rajon, ndaj dhe qeveria duhet të ndërmarrë hapa konkretë në reduktimin e tij, raporton agjencia e lajmeve NOA.

Ndonëse ishte folur për një paketë ndihme në 100 milionë dollarë, drejtuesja e lartë e Bankës Botërore nuk bëri të ditur asnjë detaj mbi financimet, që do të përfitojë qeveria shqiptare.

Gjatë konferencës së posaçme për shtyp ku ishin të pranishëm edhe përfaqësues të ekipeve të Bankës Botërore që momentalisht ndodhen në Tiranë, zonja Lvovski tha se qeveria shqiptare duhet të fokusohet në përmirësimin e politikave fiskale për të nxitur në këtë mënyrë zhvillimin e ekonomisë.

Sipas saj, ulja e borxhit publik që aktualisht ka kapur shifrën 60 % duhet të jetë një ndër prioritetet kryesore të qeverisë, operacion, për të cilin do të ketë edhe ndihmën e Bankës Botërore.

Znj. Lvovski tha se rritja ekonomike e Shqipërisë gjatë vitit 2012 do të jetë 2%, në një kohë kur qeveria ka si objektiv rritjen me 4%.

Por këto parashikime sipas saj janë të lëkundura dhe nuk mund të japin asnjë garanci për zhvillimet e mëtejshme të ekonomisë.

Drejtoresha e Bankës Botërore shprehu shqetësimin e saj për rritjen e nivelit të kredive të këqija, ndonëse e cilësoi sektorin bankar si ndër më pozitivët në ekonominë shqiptare.

Shqetësimi i BB-së

Nëpërmjet një njoftimi për shtyp të datës 6 Janar Banka Botërore ka njoftuar se në rastin e Shqipërisë, ky institucion është angazhuar me qeverinë në përgatitjen e një kredie për mbështetjen e politikave të zhvillimit, që lidhen me qeverisjen dhe konkurrueshmërinë.

Sipas Bankës Botërore qeveria shqiptare do të jetë gjithashtu në gjendje të përdorë mbështetjen shtesë nga Banka Botërore për të reduktuar dobësitë fiskale dhe për të ruajtur stabilitetin fiskal dhe makroekonimik për vijueshmërinë e rritjes ekonomike dhe krijimin e vendeve të reja të punës.

Aktualisht, Banka Botërore dhe Qeveria e Shqipërisë janë në fazën fillestare të diskutimit mbi përdorimin e portofolit të rritur të financimit.

Një grup ekspertësh të Bankës Botërore ndodhet në Tiranë për të diskutuar dhe identifikuar së bashku me partnerët e qeverisë, fushat specifike për zgjerimin e mbështetjes për reformat ekonomike, përgatitjen për goditjet e jashtme, stabilitetin dhe rritjen ekonomike.