Tiranë. Ristrukturimi i sektorit shtetëror të naftës do të prekë edhe mbi 250 invalidë të punës. Edhe pse kjo kategori të punësuarish mbrohet me ligj, drejtuesit e kompanisë shtetërore të naftës “Albpetrol” nuk kanë ngurruar të fusin në listat e personave që do të humbasin vendin e punës edhe invalidët.

E ashtuquajtura reformë e “Albpetrolit”, në prag të privatizimit të plotë të tij, pritet të përfundojë në fund të shtatorit me largimin e rreth 1200 punonjësve.

Sipas kryetarit të Shoqatës së Invalidëve të Punës, Ramiz Hoxha, nga kategoria e punonjësve që ai përfaqëson nuk ka mbetur më asnjë në “Albpetrol”. “Invalidët e punës mbrohen me ligj. Ata duhet të trajtohen nga shteti jo vetëm për zgjedhjen e vendit të punës, por dhe në rast largimesh apo reformash, kjo kategori shmanget. Me se do të jetojnë këta njerëz nëse largohen nga puna, kur edhe ata që janë të aftë fizikisht e kanë shumë të vështirë gjetjen e një vendi pune?”, thotë kryetari i Shoqatës së Invalidëve të Punës, Ramiz Hoxha.

Nga mbi 3100 anëtarë të Shoqatës së Invalidëve të Punës, vetëm rreth 250 ishin në marrëdhënie pune dhe këta në sektorin e naftës. Tashmë, me reformën e kompanisë shtetërore të nxjerrjes së naftës, asnjë person nga kjo kategori nuk është në marrëdhënie pune. Edhe pse këta punonjës të prekur nga reforma do të trajtohen me një vit pagë dhe një vit asistencë, frika e mbetjes në mes të rrugës dhe pa asnjë të ardhur nis me përfundimin e këtij afati. Sipas Hoxhës, këta persona janë bërë invalidë pikërisht në këtë sektor pune dhe tani nuk kanë se ku të trokasin më për punë dhe për më tepër, aktualisht i kufizon dhe invaliditeti.

Ndërkohë, nga burime brenda kompanisë “Albpetrol”, mësohet se reforma do të prekë vendet e punës, duke i shkrirë ato dhe jo duke larguar punonjësit nga sektorë të ndryshëm. Do të largohen vetëm ata punonjës, pozicionet e të cilëve do të preken nga ristrukturimi, sqaruan zyrtarë të “Albpetrolit”, duke justifikuar kështu shkurtimin e invalidëve.