Kryeqytetasit dje janë mërdhirë nga temperaturat e ulëta dhe bora e madhe që vazhdon të bjerë. Por sikur të mos mjaftonte kjo, ngrohtorja e qytetit “Termokos”, dje nga mëngjesi i ka befasuar kryeqytetasit me radiatorët akull dhe pa asnjë paralajmërim.

Tek më vonë u ra ndër mend që së paku të qartësojnë konsumatorët se kjo kishte ndodhur si pasojë e bllokimit të autoboteve me mazut në kufi për shkak të motit të keq dhe se për këtë ngrohtorja nuk ka pasur me çka të nisë ditën e ngrohjes.

Qytetarët akuzojnë “Termokosin” dhe Komunën e Prishtinës, për mosfurnizim me ngrohje si duhet. E zyrtarët komunalë thonë se po bëjnë gjithçka që të mundësohet ardhja e mazutit deri në depot e ndërmarrjes.

“Ku ka kështu. Të lë të mërdhish kur është më së ftohti. Nga mëngjesi nuk kemi pasur ngrohje. As me reduktime as pa reduktime. Kjo është katastrofë. Nuk e di deri kur ‘Termokosi’ do të vazhdojë kështu dhe pastaj të na faturojë paushall”, tha dje kryeqytetasi Bajram Bahtiri.

Edhe Astrit Bylykbashi thotë se dje janë mërdhirë pa ngrohje. “Ditëve tjera ka pasuar sadopak ngrohje, edhe pse me reduktime ia kemi dal disi, ndërkaq sot jemi mërdhirë. Jemi munduar të ngrohemi sadopak me ngrohëse me rrymë, por diku kah mesdita edhe rrymën na kanë ndalur. Thjesht jemi mërdhirë”, tha Bylykbashi.

Në ngrohtore thonë se autobotet me mazut kishin mbetur në terminalin doganor, për shkak të përkeqësimit të motit. Ashtu siç ishte paralajmëruar në orët e pasdites, autobotet e bllokuara pasi ishin pajisur me mjete ndihmëse, arritën në Prishtinë dhe në orët e mbrëmjes gjendja e furnizimit me ngrohje filloi të stabilizohet.

“Për dallim prej ditëve të mëhershme, që kemi ofruar ngrohje stabile për të gjithë konsumatorët tanë, fatkeqësisht, sot në orët e paradites nuk kemi arritur t’i ofrojmë energji ngrohëse, për shkak se janë vonuar autobotet me mazut, të cilat kanë mbetur në terminalin doganor, për shkak të pengesave në rrugë, si pasojë e përkeqësimit të motit”, tha dje zëdhënësja e “Termokosit”, Afërdita Uka -Fejzullahu.

Rreth orës 15:00 dy autobotet e parë me mazut, që kanë qëndruar për dy ditë me radhë të bllokuara në terminalin doganor për shkak të ngricave, kanë arritur në “Termokos”.

“Me të arritur mazuti është deponuar në rezervoaret e “Termokosit” prej nga do të përcillet menjëherë tek departamenti i prodhimit dhe do të fillojë prodhimi i energjisë ngrohëse për gjithë konsumatorët tanë”, thuhet në njoftimin e ngrohtores. Kështu furnizimi me ngrohje vazhdoi sipas orarit, që është aplikuar deri më tani në harmoni me lëvizjen e temperaturave por me reduktime në orët e mesdites.