Dimri këtë vit i ka befasuar të gjithë. Jo vetëm qytetarët, por edhe kompanitë e pastrimit të borës. Tri kompanitë që kanë fituar tenderin për pastrimin e rrugëve tanimë e kanë shpenzuar gjithë sasinë e kripës për shkrirjen e borës.

Ato i kanë bërë kërkesë Komunës për furnizim shtesë. Për këtë Komuna ka ndarë rreth 30 mijë euro për blerjen e kripës, një sasi e së cilës pritet të arrijë brenda ditës.

Drejtori i kompanisë “Pastrimi”, Feim Salihu, tha se nuk kanë pasur rezerva sa duhet të kripës. “Deri sot kemi pasur kripë. Nuk kemi pasur rezerva sa duhet, për shkak se nuk kemi pasur hapësirë sa duhet ku ta lëmë”, tha drejtori Salihu.

Edhe Enver Zymberi, drejtor i kompanisë së pastrimit “Toifor”, e cili ka fituar tenderin për pastrimin e rrugëve qendrore, thotë se sasia e kripës, e paraparë me kontratë, është harxhuar.

“Në bazë të kontratës i kemi pasur 230 tonë, ndërkaq deri tash kemi harxhuar edhe më shumë, duke i shfrytëzuar edhe rezervat e kripës që i kemi pasur nga viti i kaluar. Kanë qenë diku 13 tonë dhe po ashtu një sasi të caktuar e kemi blerë me paratë tona”, tha ai.

Ai nuk ka një shifër të saktë se sa kripë është harxhuar, për shembull vitin e kaluar.

“Nuk mund të themi se sa kemi harxhuar vitin e kaluar, pasi që për dallim nga një vit më herët në këtë vit ne kemi lloto tjetër, do të thotë rrugë të tjera” , tha ai.

Se si është gjendja në kompaninë e pastrimit “Zahiri”, ne nuk arritëm të marrim ndonjë informatë pasi ata nuk dëshironin as të komunikonin me medie. “Nuk duam të kontaktojmë për asnjë gjë”, tha një përfaqësues i kësaj kompanie.

E drejtori i Drejtorisë së Shërbimeve Publike, Agim Gashi, tha se kripa nuk do të mungojë dhe se furnizimi me kripë për këto kompani është bërë e do të vazhdojë të bëhet. “Nuk kanë të drejtë të ankohen kompanitë, kripa do t’u shkojë çdo të dytën ditë, ndërkaq qytetarët nuk kanë pse të panikohen”, tha Gashi.

Komuna e Prishtinës dje ka anuluar tenderin “Furnizimi me kripë industriale dhe rërë për mirëmbajtjen dimërore të rrugëve”, për shkak të emergjencës. “Tenderi është anuluar për shkak të emergjencës që e ka krijuar kjo borë. Kemi shkelur afatin e furnizimit. Dhe nga nesër do të bëjmë direkt blerjen e kripës për t’i furnizuar kompanitë e pastrimit”, tha i pari i zyrës së Prokurimit në Komunën e Prishtinës, Ekrem Rexha.

Ai shtoi se nga sot do të bëhet furnizimi i rregullt me kripë për kompanitë.

Zyra e prokurimit, tha ai, për këtë i ka dërguar një njoftim Organit Shqyrtues të Prokurimit (OSHP), sipas Ligjit për raste emergjente dhe se OBSH-ja, nëse nuk reagon, do të thotë se e ka pranuar kërkesën tonë.

Për blerjen e sasisë së kripës që mendohet se do të mjaftojë për përmbylljen e sezonit të sivjetmë dhe që nga sot do t’u shpërndahet kompanive, Komuna mësohet se ka ndarë rreth 30 mijë euro.