Nxënësit e shkollave në kryeqytet, por edhe disa drejtorë, e shohin të nevojshme që në shkollat e tyre të kenë mjekë të përgjithshëm apo edhe dentistë, ashtu që në ndonjë rast emergjent të mos u duhet të shkojnë në ndonjë qendër të mjekësisë familjare.

Megjithatë, disa shkollave në rast të ndonjë rasti emergjent, nuk u bie të shkojnë edhe aq larg pasi që kohëve të fundit janë ndërtuar qendra të mjekësisë familjare në afërsi të tyre.

Ata që më së shumti e shohin të nevojshme mjekun në shkollë janë nxënësit. Egzona Maliqi, nxënëse e shkollës së mesme “Eqrem Çabej”, në kryeqytet, këtë e sheh si shumë të nevojshme.

“Natyrisht. Është më se e nevojshme Për lëndimin edhe më të vogël duhet të shkojmë në ndonjë qendër të mjekësisë familjare, apo në emergjencë, e lëre më për ndonjë rast më të madh, ku do të humbisnim kohë deri në dërgimin në ndonjë qendër”, tha Maliqi.

Me të pajtohet edhe nxënësi tjetër, Besart Makolli. Ai tregon rastin e një shoku të tij i cili kishte pësuar një lëndim të madh.

“Një shok i imi, është rrëzuar në shkallë dhe ka pasur një lëndim serioz. Deri sa e kemi dërguar në Emergjencë ka derdhur shumë gjak. Sikur të ishin doktorët në shkollë, do të ishte njëfarë lehtësimi”, tha më tutje Alberti.

Mjekët nëpër shkolla ka qenë kërkesë edhe e asambleistëve komunalë në mbledhjen e fundit të Kuvendit të Prishtinës. Madje disa drejtorë të shkollave e shohin të domosdoshme praninë e mjekëve.

Qazim Çeta, dejtor i shkollës fillore “Xhemail Mustafa”, thotë se dikur ka pasur një mjek në shkollën e tij, mirëpo për shkak të mungesës së pajisjeve ai e ka lëshuar punën.

“Më herët e kemi pasur një mjek të përgjithshëm në shkollë, mirëpo për shkak se nuk ka pasur mjete të mjaftueshme ai e ka lëshuar punën”, tha Çeta, duke shtuar se do të ishte e mirëseardhur mjeku në shkollën ku ai është.

Ai megjithatë qartëson se ish-ordinanca ku ka qëndruar doktori në atë kohë tashmë është shndërruar në bibliotekë pasi shkollat, si zakonisht, kanë mungesë hapësire.

Në mungesë të doktorit, kur kanë ndonjë rast emergjent, ai thotë se e shfrytëzojnë qendrën e mjekësisë familjare, në afërsi të shkollës. Drejtoresha e fillores “Xhavit Ahmeti”, Hatmane Demiri, thotë se hapësira e dedikuar për mjekun ekziston dhe ajo është e zbrazur.

“E kemi hapësirën për doktor mirëpo, sa e di unë, në rast se kemi mbi 1700 nxënës në shkollë duhet të bëjmë kërkesë për doktor, ndërkaq shkolla jonë ka mbi 1100 nxënës. Kjo është arsyeja pse nuk kemi bërë kërkesë”, tha ajo duke konsideruar të nevojshme që secila shkollë të ketë mjekun e vet.

Lidhur me këtë drejtori i Drejtorisë së Shëndetësisë në Komunën e Prishtinës, Valbon Krasniqi, tha se ka biseduar me Drejtorinë e Arsimit dhe se janë duke u munduar të gjejnë një zgjidhje lidhur me këtë çështje.