Këshilli i Drejtorëve i Komunës së Prishtinës dje ka miratuar vendimin për lokacionin, ku do të ndërtohet objekti i xhamisë në kryeqytet. Në bazë të këtij vendimi, hapësira që ndahet për xhami shtrihet në rreth tetë ari sipërfaqe, përkatësisht përfshin pjesët e ngastrave kadastrale me numër 7437/1, fleta poseduese me numër 4137, me sipërfaqe prej 8100 m2. në vendin e quajtur “Blloku III i Ndërtesave”, apo siç njihet ndryshe si Parkingu i PTK-së, në lagjen “Ulpianë”.

Më herët Bashkësia Islame kërkonte hapësirën përballë Institutit Albanologjik, gjegjësisht në vendin ku është çerdhja “Gëzimi Ynë”. Arsyetimi ishte që është një hapësirë më e madhe, më afër qendrës, etj. por Komuna e Prishtinës si mundësi reale ofroi që atëherë hapësirën te parkingu i PTK-së.

Më në fund, u tha, nuk duhet rrënuar një institucion siç është çerdhja e fëmijëve për të ndërtuar një institucion tjetër siç është xhamia. Pas shumë takimeve me përfaqësues të Bashkësisë Islame të dy palët ranë në ujdi dhe i pari i Prishtinës, Isa Mustafa, bashkë me Këshillin e drejtorëve, dje nënshkroi vendimin.

Në orët e pasdites, kur u dha lajmi për vendimin e Komunës, nuk ishte e informuar edhe Bashkësia Islame. Resul Rexhepi, sekretar i B I-së, u shpreh të mos jetë në dijeni për vendimin.

“Deri në këto momente nuk kam informata a është marrë ky vendim. Mirëpo, sipas bisedave që kemi pasur më herët me Komunën e Prishtinës jemi të njoftuar se do të na ndahej ky lokacion ”, tha ai.

Rreth asaj se a ishte pranuar ky lokacion, kur BIK-u pati këmbëngulur për lokacionin te çerdhja, Rexhepi u përgjigj shkurt se nuk kishin zgjidhje tjetër. “Ne patëm kërkuar lokacion te çerdhja, mirëpo nuk na dhanë dhe ne nuk mund të ngelim pafund në pritje. Për këtë e kemi pranuar këtë lokacion. Më në fund ne këtë punë nuk e kemi marrë me inat.”, tha Rexhepi.

Megjithatë, Rexhepi në vazhdim thotë se lokacioni që Komuna ua ka ndarë tash, nuk i përmbush as për së afërmi kriteret dhe nuk është më i përshtatshmi.

“Jo, nuk na përshtatet, nuk na i plotëson kriteret siç i kemi dashur, sepse është hapësirë e pamjaftueshme...”, tha ai.

Se kur do të fillojnë punimet për ndërtimin e xhamisë, apo si do të duket projekti i saj, sipas Rexhepit, ende është herët të dihet.

“Ende nuk e kemi bërë projektin e xhamisë. Do ta shohim këtë së bashku me Komunën e Prishtinës. Varësisht prej lokacionit do të shpallim tenderin për hartimin e planit dhe projektit për ndërtimin e xhamisë”. Megjithatë, shton ai, së pari duhet të kryhen disa procedura si përgatitja e dokumenteve valide etj.

Fuad Ramiqi nga Lëvizja “Bashkohu”, ai që për disa javë u priu faljeve protestuese të xhumasë në mes të rrugës dje ishte e pamundur të kontaktohej pasi nuk kishte qasje në telefon.