Dimri po vazhdon të tregohet i ashpër. Por, nga kjo gjë po përfitojnë shumë njerëz. Disa nga ta janë drushitësit, të cilët i kanë rritur çmimet e druve dyfish më shumë se që kanë qenë. Edhe ata që janë nëpër shtëpi, por edhe ata që janë në banesa e që janë të varur nga ngrohtorja e qytetit, vazhdojnë të mobilizohen që ta kalojnë disi dimrin.

Rryma, druri dhe thëngjilli ngelin alternativat. Pra, shumë familje do t’i kthehen ngrohjes tradicionale, paksa të harruar, asaj me stufa dhe shporet me dru dhe thëngjill. E, disa ende i varin shpresat te “Termokosi”, që mbase do ta përmisojë ngrohjen.

Kjo mund të shihet nëpër dyqane të teknikës së bardhë, ku qytetarët kërkojnë të blejnë stufa shtesë për të ngrohur dhomat tjera të shtëpisë, pasi që tash kur acari është shumë i madh, energjia elektrike është me reduktime të ashpra.

Halime Seferi, banore e lagjes “Dardania” ka vendosur në banesën e saj stufë kaminë për t’i ngrohur fëmijët, ngase ka hequr dorë nga sistemi i ngrohjes që vjen nga “Termokosi”.

““Termokos” është duke na mërdhirë sivjet, pasi që nuk është duke ofruar ngrohje si duhet dhe si kërkohet, kështu si është duke vazhduar më mirë le ta ndalë krejt. Dhe, kjo është zgjidhja më e mirë për familjen time”, tha ajo.

E, banori tjetër, Asdren Kastrati, tha se si alternativë të ngrohjes ka zgjedhur ngrohjen me dru, e nëse mund të sigurojë edhe pak thëngjill. ”E kam vendosur një stufë, sepse do ta kem më të sigurt ngrohjen, thotë Asdreni. I kam blerë drutë të cilat shpresoj se do të më dalin deri në fund të dimrit, pasi që dhe besoj se sivjet do të dalim në pranverë “, shprehet ai.

Ndërsa, në dyqane vërehej një interesim i madh i qytetarëve për blerje të stufave. Në dyqanin “Class Trade”, i cili gjendet te Xhamia e Llapit, sipas pronarit, shitja e stufave me ngrohje të ngurtë, këto ditë është shumë e madhe. “Kemi stufa nga më të ndryshmet. Çmimet sillen nga 80 deri në 200 euro për një stufë, varësisht nga modeli. Edhe lokalet e bizneseve kanë vendosur stufa dhe shporete për ngrohje.

Në anën tjetër, shitësit e druve duket se e kanë shfrytëzuar këtë situatë dhe kanë ngritur çmimin e druve, e këtë më së shumti e ndiejnë qytetarët, të cilët do të ngrohen me dru. Aktualisht, një metër kub dru kushton nga 55 deri në 70 euro, përderisa në fillim të dimrit kanë qenë nga 25 deri në 40 euro.

Hasan Bekteshi, drushitës në një lagje të kryeqytetit, thotë se nuk e kanë bërë shtrenjtimin e druve pse kanë dashur, por se iu është imponuar.

“Rrugët janë bllokuar, dhe nuk po mund të shkojmë të marrim dru në katund ku kemi marr më herët. Ato dru që i kemi pasur jemi detyruar t’i shtrenjtojmë, jo vetëm unë por edhe shumë tjerë”, tha ai.