Për çdo rast emergjent, si në rast të bllokimit të rrugëve nga bora, në fshatrat malore, nga ndezja e zjarreve nëpër pyje gjatë verës, në rast të ndonjë sëmundjeje, etj, Komuna e Prishtinës, që nga viti 2002, është duke zbatuar një sistem të radiolidhjeve.

Ky sistem, sipas komunarëve, është mjaft i rëndësishëm, pasi banorët në rast se mbesin të izoluar nga bora, si tash, në rastin e vërshimeve, apo të katastrofave të tjera natyrore, por edhe të nevojave të tjera emergjente, përmes radiolidhjeve njoftojnë menjëherë qendrën komunale për informim dhe alarmim, e ku kjo e fundit, menjëherë do të thërrasë kompanitë përgjegjëse, si Zjarrfikësit, Ujësjellësin, për ndonjë prishje të gypit, Ndihmën e shpejtë, etj .

Sipas Fatmir Bilallit, shef në Qendrën komunale për informim dhe alarmim, radiolidhja kryesore bazë është e vendosur në lokalet e Qendrës Komunale, ku bëhet monitorimi i radiolidhjeve të tjera bazë ose të dorës së dytë, ndërkaq radiolidhjet e tjera bazë janë të vendosura në bashkësitë lokale të komunës së Prishtinës. Si prioritet, për pajisjen me radiolidhje kanë qenë zjarrfikësi, Ndihma e shpejtë, Enti Hidrometeorologjik. Përveç tyre, me radiolidhje janë të pajisur edhe dejtoritë e Kuvendit Komunal të Prishtinës dhe ndërmarrja “Hortikultura”.

Bilalli më tutje shtoi se me 21 radiolidhje që janë të vendosura në bashkësitë lokale të Komunës së Prishtinës, është e mbuluar e gjithë hapësira e nevojshme për informim. E të gjitha këto radiolidhje, tha ai, funksionojnë përmes antenës kryesore, që është e vendosur në fshatin Butovc, ku është pika më strategjike për mbulimin e territorit të komunës së Prishtinës me valë.

“Përmes këtyre radiolidhjeve, rrjeti, në raste emergjente, por edhe në raste të tjera kur kërkojnë ndihmë, banorët përmes këtyre radiolidhjeve informojnë Qendrën dhe operatorin kujdestar, që punojnë 24 orë. Pasi që marrin kërkesat e kryetarëve të këshillave të bashkësive lokale në komunën e Prishtinës, punëtorët e Qendrës komunale, menjëherë informojnë organet kompetente, si Zjarrfikësit, Entin e Ndihmës së shpejtë, Policinë, Ujësjellësin, KEK-un, për t’u dalë në ndihmë banorëve“, tha ai .

Ilmi Uka, kryetar i Këshillit të katër bashkësive lokale, Keqekollë, Prapashticë, Nishevc e Ballaban, tha se pajisja me këtë radiolidhje nga Komuna, i ka ndihmuar shumë.

“Radiolidhjen e posedoj ka 7 apo 8 vjet dhe na ndihmon shumë, për çdo rast emergjent që i kaplon këto fshatra”, tha ai .

Sipas tij në këto raste kur bora bllokon rrugët, po ashtu në pranverë apo edhe në vjeshtë kur qytetarët ndezin zjarret, ne menjëherë informojmë Qendrën komunale, dhe ata na vijnë në ndihmë shumë shpejt, duke thirrur organet përkatëse, si Zjarrfikësit, kompanitë e pastrimit, etj, të cilët çdo herë arrijnë me kohë.