Po të ndodhte, mos e thëntë Zoti, që në kryeqytet të ndodhte ndonjë zjarr, tërmet, vërshim apo fatkeqësi tjetër që do të kërkonte alarmimin e popullatës, vaj halli për ne.

Antena kryesore që ishte e vendosur në objektin më të lartë në kryeqytet, mbi “kullën” e ish “Rilindjes”, para katër vjetësh u hoq nga aty gjatë rinovimit të ndërtesës, ku u vendos një pjesë e Qeverisë. Dhe prej atëherë s’i ka rënë kujt ndër mend ta kthejë në vend që do të thotë se tash katër vite kryeqyteti është pa antenën kryesore të alarmimit publik.

Për shkak të zhvendosjes së antenës kryesore jashtë funksionit janë edhe gjashtë sirenat e alarmimit të cilat janë të vendosura në kryeqytet. Arsyen për këtë neglizhencë askush nuk do ta marrë mbi vete.

Zyrtarët komunal, thonë se shumë shpejtë do të rivendoset antena aty ku ka qenë. Ata madje thonë se Komuna ka plan edhe për vendosje shtesë të sirenave të alarmimit.

E qytetarët, si zakonisht, as që çajnë kokën për këso “cikërrimash” pasi për sigurinë e tyre ka kush merret. Madje shumë nga qytetarët as që kanë dëgjuar se ka antena të këtilla. E për atë se si mund ta njohin llojin e alarmit në rast zjarri , tërmeti të madh, etj. as që bëhet fjalë.

E de jure, në kuadër të Sektorit të Mbrojtjes dhe Shpëtimit, funksionon edhe Qendra Komunale për Informim dhe Alarmim në raste rreziqesh. Ajo madje ka edhe shefin e saj. Ai është Fatmir Bilalli dhe lidhur me antenën që është hequr katër vite më parë ai ka rrëfimin e vet.

“Antena kryesore, e po ashtu gjashtë sirenat e alarmimit u patën vendosur diku në vitin 2008. Por këto sirena nuk kanë arritur të funksionojnë për shkak se antena kryesore apo repititori që ka qenë i vendosur në objektin e ri të Qeverisë, e patëm larguar për shkak të renovimeve”, tha ai pa ndonjë shpjegim pse nuk u kthe në funksion.

Ai thotë se antena do të vendoset, madje “shumë shpejt” aty ku ka qenë. “E kemi marr lejen nga Ministria e Administratës dhe Pushtetit Lokal (MAPL), dhe do ta vendosim atë antenë aty ku ka qenë”, tha ai duke shtuar se tash vetëm pritet të përmirësohet moti.

Qendra që ka në krye z. Bilalli drejtpërdrejt përkujdeset për vënien në funksion të antenës. Gjashtë sirenat ekzistuese janë të vendosura, janë kryesishtë nëpër shkolla fillore të kryeqytetit si “Ismail Qemali”, “Naim Frashëri”, “Asim Vokshi”, “Gjergj Fishta”, “Nazim Gafurri”, si dhe njëra në gjykatën ekonomike në “Ulpianë”.

Bilalli thotë se këto sirena nuk janë të mjaftueshme andaj do të vendosen edhe pesë të tjera.

Sipas Bilallit, sirenat aktivizohen vetëm në ndonjë fatkeqësi të madhe. Rastet si zjarret, fatkeqësitë natyrore, helmet kimike, etj, kanë karakteristikat e zërave valore të ndryshme, me qëllim që qytetarët ti identifikojnë llojin e rrezikut por ata madje thonë se jo vetëm nuk i dinë llojet por as që kanë dëgjuar se në kryeqytet ka antena të alarmimit.