“Termokosi” dy ditë më parë ka dhënë alarmin, duke kërkuar nga qeveria urgjentisht para donacion shtesë ose në të kundërtën do t’i japë fund sezonit të ngrohjes. Me rezervat e mbetura, siç u tha, ngrohja për sivjet do të përfundojë me ditën e djeshme.

Mbase si përgjigje dje në një njoftim publik qeveria, përkatësisht Ministria e Zhvillimit Ekonomik (MZHE), ka bërë publike se një ditë më herët, gjegjësisht më 13 shkurt, në konton e Ngrohtores ka bërë bartjen e 2 milionë eurove donacion.

“Qeveria e Republikës së Kosovës përmes Ministrisë së Zhvillimit Ekonomik gjatë këtij viti do të subvencionojë ndërmarrjen “Termokos” me 3 milionë euro. Mjetet e ndara për vitin 2012, gjegjësisht më 13 shkurt në llogarinë e Termokos-it janë bartur 1.463,000 euro, ndërsa deri në fund të këtij muaji do të paguhen edhe 540.000 euro që do të thotë se subvencionet vetëm në këtë muaj arrijnë shumën prej 2 milionë eurosh”, thuhet në njoftimin e MZHE-së. Pjesa tjetër e subvencionit për “Termokosin” në vlerë prej 1 milion euro, sipas njoftimit, do të transferohet në vjeshtën e këtij viti.

Përkundër kësaj, zyrtarë nga “Termokosi” dje thanë se 2 milionë eurot e MZHE-së mjaftojnë vetëm për të paguar mazutin e shpenzuar, për muajin janar e deri më 15 shkurt 2012, ndërsa 1 milion euro janë të dedikuara për sezonën e ardhshme të ngrohjes. Sipas zëdhënëses Afërdita Uka - Fejzullahu, këto mjete nuk do të ndihmojnë fare vazhdimin e ngrohjes.

“Këto mjete nuk kanë të bëjnë fare me kërkesën që “Termokosi” ia kishte bërë një ditë më parë Qeverisë së Kosovës për mbështetje shtesë financiare. Më këto mjete ne do të detyrohemi të paguajmë borxhin për mazutin e blerë, pasi që muajin e kaluar e kemi porositur mazutin pa pasur mjete. Këto mjete është dashur të transferohen në fillim të janarit..”, tha ajo.

Me dy milionë eurot e ndara nga MZHE-ja, përveç pagesës së borxhit të mazutit, nuk do të ndihmohet fare vazhdimi i ngrohjes.

“Nëse nuk sigurojmë ndonjë mbështetje nga Qeveria, do të detyrohemi të ndërprejmë ngrohjen”, tha ajo.

Për sezonin ngrohës 2011/12 “Termokosit” nga Qeveria e Kosovës dhe Komuna e Prishtinës i janë ndarë gjithsej 3.404.000,00 euro (nga Qeveria 2.904.000 ndërsa nga Komuna e Prishtinës 500.000 euro).

“Termokos” nga fillimi i sezonit të sivjetmë të ngrohjes (12 nëntor 2011 deri më 15 shkurt 2012) thotë se ka shpenzuar 5.045.52 tonë mazut, në vlerë financiare 3.580.532.750 euro. Planifikimi i shpenzimit të mazutit për tërë sezonin shkonte në 11 mijë tonë, që do të kushtonin 7.800.000 euro.

Komuna thotë se e kupton gjendjen e “Termokosit” por s’ka ç’t’i bëjë pasi nuk kanë mjete financiare për ta ndihmuar.