Plaku Halil Sherifi ka fatin e keq të banon në një nga ndërtesat e larta të Prishtinës. Në të vërtetë fati i tij i keq s’ka të bëjë shumë me katin e lartë por me faktin se në ndërtesën e tij nuk punon ashensori. E atij disa herë gjatë një dite i duhet të dalë, qoftë për të blerë bukë, shpeshherë për të shkuar te mjeku apo nevoja të tjera. Për këtë detyrohet të luajë rolin e atletit duke kaluar me qindra shkallë.

Në ndërtesën ku ai jeton, ka dymbëdhjetë vjet që nuk punon ashensori. Dikush do të thoshte se tanimë do të duhej të ishte mësuar me këso atletike të përditshme por me gjithë avancimin në këtë sport të detyruar, Halili është 77-vjeçar dhe banon në katin e gjashtë, në soliterin numër 3 në lagjen “Ulpiana”.

“Shkallët janë shumë të vështira, sidomos tash dimrit që është mjaft ftohtë. Sidomos në këtë ndërtesën tonë, ku edhe dritaret e ndërtesës janë të thyera”, tha Halili.

Ai thotë se banorët e këtij soliteri disa herë i janë drejtuar me ankesë komunës, por ajo përveç premtimeve nuk ka bërë asgjë më shumë. “I jemi ankuar komunës, por asgjë deri më tash nuk është bërë. Ata të komunës vijnë e na japin premtime, sidomos kur u duhen votat”, tha ai.

Edhe banorja e një ndërtese tjetër thotë se mungesa e ashensorëve po u shkakton probleme. “Jetoj në katin e tetë dhe ashensori nuk punon Ka dhjetë vjet që nuk ka punuar. Më duhet disa herë në ditë t’i përshkoj shkallët, kur shkoj në punë, kur vij, për ndonjë punë, etj..”, tha Ulkina Bahtiri, e cila jeton në afërsi të PTK-së, gjegjësisht në objektin SU 1/5, llamella V. Ajo thotë se edhe moskujdesi i banorëve ka bërë që kjo çështje të zvarritet.

“Kemi biseduar disa herë për të mbledhur para për riparimin e ashensorit por kjo ka rënë në vesh të shurdhër. Banorët deri në katin e katërt nuk kanë edhe fort interes e paratë e banorëve nga katet tjera nuk mjaftojnë”, tha ajo.

Komunarët thonë se Komuna e Prishtinës, si edhe viteve tjera edhe sivjet ka ndarë mjete për riparimin e ashensorëve të prishur por sa është ajo shifër, nëse i kanë ndarë nuk duan të tregojnë.

“Po vazhdon riparimi i ashensorëve që ka filluar vitin e kaluar”, tha Habib Qorri, shef i sektorit në Drejtorinë e Shërbimeve Publike. “Shumë shpejt” siç ai tha, duke mos saktësuar ndonjë datë apo muaj, do të fillojë faza e dytë e riparimit.

“Të gjitha kërkesat që i kemi marrë nga qytetarët për riparime të ashensorëve do të realizohen këtë vit”, tha më tutje ai. Se sa është numri i ashensorëve që janë riparuar vitin që e lamë pas, e sa këtë vit, ai nuk dha ndonjë shifër.

“Nuk e di sa është numri i ashensorëve që janë riparuar, por e di se ende po vazhdon riparimi i tyre. Edhe këtë vit, do të ketë riparime, por së pari do të hapet tenderi. E varësisht nga kërkesat e qytetarëve të cilat kanë arritur te ne, do të ketë edhe riparime”, tha ai.