Numrit të madh të veturave në kryeqytet dhe tollovisë së tyre, ka kohë që po i ndihmon në masë të madhe edhe prania e veturave, kombibusëve dhe taksive të tjera ilegale, të cilët kanë pushtuar çdo rrugë të kryeqytetit. Ata s’kanë të ndalur, pasi që siç thonë ata, nuk ndalen edhe në prezencë të policisë, apo të inspektorëve komunalë, pasi që, sipas tyre, me diçka duhet të jetojnë dhe të mbajnë familjet e tyre.

Nga ana tjetër, auto-taksitë legale të cilët kryejnë obligimet e tyre ndaj komunës ankohen se punën ua kanë marrë “ilegalët” dhe askush nuk kujdeset që t’i largojë ata nga tregu.

F. A, autotaksist legal, i cili thotë se obligimet e tij ndaj komunës i kryen me rregull, kritikon organet kompetente.

“I shoh me sy të mi, policia është afër stacioneve, vjen vetura me numër katër, apo ka edhe të atilla që kanë të vendosur logon “TAXI” mbi veturë dhe punojnë pa pasur frikë, si të ishin legalë, pa u penguar nga askush”, shtoi ai dhe nuk dëshiron të identifikohet.

F.A. fajëson ilegalët, por më shumë fajëson kompetentët, të cilët rrinë duarkryq e nuk bëjnë asgjë. Në anën tjetër në stacionin afër “Grandit”, Naser Latifi, me veturën e tij që punon ilegalisht çdo ditë merr udhëtarë, duke i ndërruar numrat të cilët tregojnë destinacionin.

“Punoj kohë të gjatë dhe nuk frikësohem nga askush, se ai që më ndal, le të ma sigurojë kafshatën e gojës për fëmijët e mi ”, shtoi Latifi. Më tutje ai tregon se shpeshherë edhe e ndërron destinacionin, nga numri një vendos katër, varësisht si e sheh grumbullin e njerëzve duke pritur në stacione të autobusëve.

Ai thotë se edhe kur ta ndalë policia apo inspektorët, ai përsëri do të vazhdojë këtë punë, pasi që nuk ka punë tjetër. Edhe kompania “Trafiku Urban”, është në hall me ilegalët.

“Tash jemi stabilizuar pak me autobusët, po përsëri po kemi probleme nga ilegalët, të cilët s’po na lënë mi hap sytë ... Çdo ditë po e kemi këtë problem, bile tash në masë edhe më të madhe dhe më të theksuar”, u shpreh një shofer nga “Trafiku Urban”.

Për dallim nga “Trafiku Urban”, të cilëve po iu shkakton problem prania e ilegalëve, qytetarëve prania e kombibusëve, e veturave të vogla me numra të ndryshëm, sikur po iu ndihmon.

“Po na shpëtojnë këto veturat e vogla, autobusët po vijnë shumë rrallë dhe në këtë të ftohtë nuk po mundemi me pritë”, tha qytetarja Valentina Berisha. Por, vetëm një gjë i pengon, te këto vetura, asaj.

“Sikur të ishin legalë dhe më të sigurt, pa përtesë do të udhëtoja me to, pasi që po janë shumë të shpeshtë, më të shpejtë se autobusët të cilët po vonohen shumë “, tha ajo. Ndërkaq, Komuna e Prishtinës disa herë ka deklaruar se është duke punuar për largimin e ilegalëve nga rrugët.