Qentë endacakë kanë filluar me të madhe të bëhen shqetësim për kryeqytetasit. E përderisa qentë janë bërë shqetësim, Komuna e Prishtinës kohë më parë ka anuluar tenderin për vrasjen e qenve ndacakë, për shkak të reagimeve të disa shoqatave se nuk duhet vrarë, por duhet gjetur një mënyrë tjetër për asgjësimin e tyre.

Por, qytetetarët ngrenë zërin kundër Komunës së Prishtinës që numrin e madh të qenve që gjenden në rrugët e Prishtinës duhet vrarë, në mënyrë që të mos pësojnë.

Kryeqytetasi Besnik Isaku tha se në lagjen ku ai jeton nuk ka pse të dalë në rrugë nga qentë .

“Ka shumë qenë në lagjen tonë. Gjithmonë si në mëngjes, si në mesditë ata janë në rrugë, si tufë. Bile ka pasur disa raste kur qeni ka dashur ta sulmojë vajzën time, por fatmirësisht ajo më ka njoftuar me kohë”, tha Isaku, nga lagjja “Vreshta”. Ai thotë se forma më e mirë që Komuna të zhdukë qentë nga rrugët është vrasja e tyre.

Njëjtë si ai mendon edhe një qytetar tjetër, Agron Selmani nga rruga “Bledi” në kryeqytet. “Janë bërë rrezik për banorët e lagjes sonë, e posaçërisht për fëmijët, të cilët po shkojnë në shkollë në orët e hershme të mëngjesit . Komuna e Prishtinës njëherë e nisi këtë projekt për vrasjen e qenve , por tash e la, e si duket pret të ndodhë ndonjë rast kur do të pësojë dikush nga ne, që tek atëherë Komuna të marrë ndonjë inciativë”, tha ai, përderisa i bën apel Komunës që menjëherë të dalë me një projekt për vrasjen e qenve. Agnesa Makolli tregon se si njëherë gati e ka pësuar nga qentë.

“Kam qenë duke shkuar në shkollë, në orët e hershme të mëngjesit dhe gati sa nuk kam vdekur nga frika kur një grumbull i qenve më kanë ardhur nga pas. Po të mos ishte një zotëri me veturë, unë me siguri do të kisha pësuar”, tregon ajo.

Një njëri i panjohur, tha ajo, është ndalur afër meje dhe i kishte ndjekur qentë, ndërkaq kam shpëtuar për një fije floku. OJQ “Animal Friends of Kosovo” para disa ditësh ka lancuar programin për sterilizimin e kafshëve.

“Vrasja me armë është barbare dhe nuk i jep Kosovës imazh të mirë në botë, ndaj e vetmja metodë e përshtatshme për trajtimin e qenve endacakë është sterilizimi, e cila është pranuar dhe përkrahur nga organizata botërore që merren me mirëqenien e qenve”, kanë thënë përfaqësues të kësaj organizate.

Përfaqësues të kësaj organizate kanë falënderuar Komunën e Prishtinës dhe e kanë përgëzuar atë për hapin e madh që ka bërë në ndaljen mizore të vrasjes së qenve endacakë, duke thënë se shembullin e kryeqytetit duhet ta ndjekin edhe të tjerët.

Ndërkaq, përfaqësues nga Komuna e Prishtinës thanë se kostoja e projektit për trajtimin e qenve endacakë është e lartë, por që nuk ka kthim prapa nga ky vendim.

Të gjitha komunat duhet të veprojnë si Prishtina dhe se çështja duhet të zgjidhet në organet qendrore të shtetit, të cilat do duhej të siguronin para për komunat në mënyrë që një projekt i tillë të funksionojë.