Pesha e madhe e borës mbi kulmin e dy barakave të vjetra në lagjen “Arbëria”, ku tash sa vite jetojnë familja Behrami nga Koliqi dhe Selmani, nga Zhitia e Podujevës, i ka lënë pa kulm mbi kokë. Rrëzimi i një pjesë të madhe të kulmit, dhe hapja e shumë të çarave tjera, po rrezikon jetën e dy familjeve e në veçanti të fëmijëve të vegjël.

Familja Behrami dhe ajo Selmani, të cilat që nga paslufta jetojnë në këto baraka, druajnë se këto ditë sërish mund të bëjë të ftohtë dhe të bie borë apo shi dhe uji do të depërtojë brenda në dhoma.

Ata të vetmen shpresë thonë se e kanë Komunën e zyrtarët komunalë thonë se po shikojnë për ndonjë zgjidhje por deri tash diçka konkrete nuk ka.

Resmije Behrami, nga fshati Koliq, thotë se nga paslufta kanë ardhur të jetojnë në këto baraka, për shkak në fshat shtëpinë e kishte të djegur.

Ajo kujton mbrëmjen e kur kulmi u përmbys mu në kohën kur po bëhej gati të vinte fëmijët në gjumë.

“Ishte diku rreth orës 21:00, të dielën mbrëma. Papritmas u dëgjua një dridhje dhe zhurmë të madhe. Veç Zoti më ka ndihmuar që shpejt e shpejt t’i largoj fëmijët nga dhoma ku është rrëzuar kulmi”, tregoi ajo.

Kulmi i vjetër i barakës, sipas saj, nuk do t’i rezistojë ndonjë bore apo shiu tjetër. Ajo, bashkë me gjashtë anëtarët tjerë të familjes, thotë se nuk di kah t’ia mbajnë pasi kushtet ekonomike i ka të rënda.

Sipas saj, Komuna e Prishtinës, me tu njoftuar ka ardhur dhe “e ka parë gjendjen por nuk na kanë ndihmuar e as premtuar ndonjë gjë”, tha ajo. Ngjitur për barakën e tyre gjendjet edhe familja Selmani, e cila ka të njëjtin hall.

“Nga rrëzimi i kulmit janë çarë edhe muret tjera , tavanet e krejt dhomave, e tash në vend të kulmit kanë mbetur disa dërrasa në të cilat po depërton drita nga jashtë, e po pikon gjithandej”, tha kryefamiljari Gani Selmani.

Komuna shprehet se është në dijeni për këtë rast. “Jemi duke bërë përpjekje të gjejmë një zgjidhje që ato familje të mos vijnë në gjendje edhe më e keqe”, tha Ndue Kalaj, shef komunal i Sektorit për Mirëqenie Sociale.

Sipas tij, barakat në të cilat jetojnë këto familje, por edhe tjera në afërsi, nuk janë pronë e tyre, dhe ata një ditë duhet t’i lirojnë ato. Ai tha se Drejtoria e Emergjencës ka bërë inspektimin e gjendjes, fotografimin dhe po mundohet t’u bëjë një zgjidhje.

Komuna, sipas tij, po sheh çfarë të bëhet “sepse për çdo gjë ne duhet të përfillim disa procedura të gjata. Megjithatë në këtë rast duhet t’i shkurtojmë ato procedura dhe të bëjmë një zgjidhje sa më të shpejtë”, tha ai duke theksuar se Komuna nuk i ka vendosur këto familje në baraka, dhe se ata nuk kanë asnjë vendim për banim aty.

Megjithatë, shatoi ai, këto familje por edhe shumë të tjera do ti ndihmojnë përderisa jetojnë në komunën e Prishtinës.