Liqeni krater ose Crater Lake, është një mrekulli e natyrës dhe është liqeni më i thellë i Shteteve të Bashkuara, i krijuar nga një shpërthim i fuqishëm vullkanik rreth 7000 vjet më parë në zonën jug qendrore të Oregonit. Çiltërsia e një liqeni të madh malor, lartë në Kaskadën e Oregonit jugor, duket një vend i pazakontë për një betejë epike të shpirtrave indianë, ... apo për një shpërthim kataklizmik të tokës.

E pra, peizazhi paqësor i liqenit krater u krijua pikërisht në këtë atmosferë dhune të natyrës. Kjo është historia që kanë përcjellë nga shekulli në shekull banorët indigjenë të kësaj toke, njerëzit e fisit Klamath. Një palë shkrepa imponuese personifikojnë heroin dhe djallin e kësaj përralle.

Një prej tyre personifikon Skellin, shpirtin e dritës në botën mbi dhe, ndërsa tjetri Laun, sundimtarin e errësirës në botën e nëndheshme. Lau, shpirti i nëndheut u zëmërua me njerëzit e veriut. Ai doli nga malet e mëdha mes një reje tymi dhe me një zë gjëmues u zotua t’i shkatërrojë ata. Skelli, shpirti i botës mbi dhe, erdhi për t’i mbrojtur njerëzit. Për shumë ditë dhe net, Lau dhe Skelli luftuan përmes lumenjve të zjarrit dhe perdeve të hirit.

Në betejën e fundit të ashpër, Skelli e detyroi Laun të futej përsëri nën dhe, në strehën e tij të errësirës dhe terrorit dhe pastaj shembi malin përmbi të. Për ta ndaluar Laun të shpëtonte, shpirtat e stuhisë e mbuluan me ujë portën e hyrjes në botën e nëndheshme. Dhe kështu paqja dhe qetësia u rikthyen në tokë. Ai është aq i kthjellët, sa që renditet ndërmjet burimeve më transparente ujore në tokë dhe është liqeni më i thellë në Shtetet e Bashkuara, mbi 600 metra.