Lugina e Vdekjes (Death Valley) është depresioni më i thellë, që shtrihet në Amerikën Veriore në territorin e shtetit federal të Kalifornisë. Lugina e Vdekjes është çudia e shkretëtirës së nxehtë, e cila i ka tri rekorde: më e nxehta, më e thata dhe më e ulëta në Amerikën Veriore. Shtrihet në juglindje të masivit malor të Siera Nevadës.

Kufizohet në lindje me malin Grapevine Mountains, Funeral Mountains dhe Amargosa Range, në perëndim me malet Cottonwood Mountains dhe masivin Panamint. Lugina e Vdekjes ka pikën më të ulët në hemisferën veriore, ndodhet 85m nën nivelin e detit. Temperatura më e lartë është shënuar në SHBA dhe e dyta në botë, ka qenë 56.7 ºC në Greenland Ranch në afërsi të luginës më 10 korrik të vitit 1913.

Temperaturat më të larta mesatare janë në korrik që arrijnë në 47 ºC, ndërsa temperaturat më të larta se 40 ºC janë të shpeshta. Të reshurat atmosferike janë të pakta vetëm 50 mm të reshura në vit. Lumejt Amargosa dhe Furnace Creek rrjedhin nëpër luginë por humbin në rërën e shkretëtirës.

Mirëpo, edhe përkundër këtyre temperaturave të larta, prapë në sipërfaqen e kësaj shkretëtire, jetojnë një numër jo i vogël i gjallesave, sidomos i zvarranikëve dhe insekteve, por mund të gjenden edhe antilopa, lepuj dhe çakej.