Së paku 20 turistë që notonin, kanë marrë lëndime serioze kur në një lum në juglindje të Brazilit, i kanë sulmuar piranjat. Ky sulm i pazakontë i një numri të madh të piranjave të llojit barkkuq, ka befasuar qindra turistë, të cilët po laheshin në plazhin në Toropia, që gjendet në shtetin Rio Grande do Sul.

Dhe me këtë rast së paku 20 turistë kanë marrë lëndime nga kafshimet e piranjave nëpër duar, këmbë dhe në fytyrë dhe aty për aty u është dhënë ndihma, bëjnë të ditur mediet e atjeshme.

Ekipi i shpëtimit mendon se piranjat janë nisur në sulm për shkak të nivelit tejet të ulët të ujit në lum, për çka këta peshq grabitqarë nuk kanë mundur të sigurojnë ushqim. Zyrtarët e atjeshëm për momentin e kanë ndaluar larjen e mëtutjeshme në këtë lum, për shkak të rrezikut të madh nga sulmi i sërishëm i piranjave.